ທ່ານສີຈິ້ນຜິງ ປະທານປະເທດຈີນໄດ້ສົນທະນາທາງໂທລະສັບກັບທ່ານໂດນັນ ທຣຳ ປະທານາທິບໍດີອາເມລິກາໃນວັນທີ 10 ກຸມພານີ້.
ໂອກາດດັ່ງກ່າວ, ທ່ານສີຈິ້ນຜິງ ໄດ້ຊົມເຊີຍທ່ານທຣຳທີ່ຂຶ້ນດຳລົງຕຳແໜ່ງປະທານາທິບໍດີອາເມລິກາຢ່າງເປັນທາງການ ແລະ ສະແດງຄວາມຂອບໃຈທ່ານທຣຳທີ່ໄດ້ສົ່ງສານອວຍພອນເຖິງປະຊາຊົນຈີນໃນວັນທີ 8 ກຸມພານີ້ ໂອກາດບຸນກຸດຈີນປີລະກາ ແລະ ບຸນຂະໜົມບົວລອຍ ທັງໄດ້ສະແດງຄວາມຊົມເຊີຍຢ່າງສູງຕໍ່ທ່ານທຣຳທີ່ກ່າວວ່າຍົນດີສຸມທຸກຄວາມພະຍາຍາມເພື່ອເປີດກວ້າງການຮ່ວມມືລະຫວ່າງສອງປະເທດ, ພັດທະນາສາຍພົວພັນສອງຝ່າຍທີ່ເປັນການສ້າງສັນທີ່ມີຜົນປະໂຫຍດຕໍ່ອາເມລິກາ ແລະ ຈີນ ກໍຄືປະຊາຄົມໂລກ.
ທ່ານທຣຳໄດ້ສະແດງຄວາມຂອບໃຈ ແລະສົ່ງຄຳອວຍພອນປີໃໝ່ເຖິງທ່ານປະທານສີຈິ້ນຜິງ ແລະ ປະຊາຊົນຈີນອີກເທື່ອໜຶ່ງ ທັງເນັ້ນວ່າ: ຂ້າພະເຈົ້າຮັບຮູ້ເຖິງຄວາມສຳຄັນສູງທີ່ລັດຖະບານປະເທດຕົນປະຕິບັດນະໂຍບາຍປະເທດຈີນດຽວຢ່າງເຕັມສ່ວນ ແລະລັດຖະບານປະເທດຕົນຈະຍຶດໝັ້ນປະຕິບັດນະໂຍບາຍດັ່ງກ່າວ.
ປະມຸກລັດສອງປະເທດເຫັນດີຈະຮັກສາການພົວພັນຢ່າງໃກ້ຊິດ ເພື່ອແລກປ່ຽນຄວາມເຫັນຢ່າງທັນການກ່ຽວກັບບັນຫາທີ່ສອງຝ່າຍສົນໃຈຮ່ວມກັນ, ເພີ່ມທະວີການແລກປ່ຽນແລະຮ່ວມມືໃນຂົງເຂດຕ່າງໆ ທັງຫວັງວ່າສອງຝ່າຍຈະໄດ້ພົບປະກັນໃນອີກບໍ່ດົນຕໍ່ໜ້າ.
