ຂ່າວສານສູນກາງ ສປປ ເກົາຫຼີລາຍງານໃນວັນທີ 13 ກຸມພານີ້ວ່າ: ປະເທດຕົນໄດ້ສຳເລັດການຍິງລູກສອນໄຟນຳວິຖີຈາກໜ້າດິນສູ່ໜ້າດິນຂັ້ນຍຸດທະສາດໄລຍະກາງ-ຍາວ ລູກໜຶ່ງ ໃນວັນທີ 12 ກຸມພານີ້ ໂດຍທ່ານກິມເຈິງອຸນ ຜູ້ນຳສູງສຸດໄດ້ໄປຊີ້ນຳການຍິງຢູ່ສະຖານທີ່.
ຂ່າວແຈ້ງວ່າ, ລູກສອນໄຟນຳວິຖີ "Pukguksong-2" ໄດ້ຄົ້ນຄວ້າຜະລິດຂຶ້ນບົນພື້ນຖານຜົນສຳເລັດໃນການຍິງລູກສອນໄຟນຳວິຖີຍິງຈາກໃຕ້ນ້ຳເມື່ອເດືອນສິງຫາປີຜ່ານມາ. ຂະນະທີ່ການຍິງເທື່ອນີ້ໄດ້ທົດສອບຄວາມເຊື່ອຖືໄດ້ ແລະ ຄວາມຮັບປະກັນຂອງລະບົບຍິງຈາກພື້ນດິນ ທັງໄດ້ຢືນຢັນລັກສະນະພິເສດຈຳເພາະຂອງອາວຸດທີ່ກ່ຽວຂ້ອງ. ນອກນີ້, ການຍິງເທື່ອນີ້ຍັງໄດ້ທົດສອບສະມັດຖະພາບຂອງລະບົບນຳວິຖີໂຈມຕີແມ່ນຢຳແລະການຫຼົບຫຼີກການສະກັດຂອງລູກສອນໄຟນຳວິຖີທີ່ສາມາດບັນຈຸຫົວຮົບນິວເຄລຍລະດັບສູງກວ່າເກົ່າດັ່ງກ່າວ.
ລາຍງານຂ່າວໄດ້ເນັ້ນວ່າ: ໂດຍພິຈາລະນາເຖິງຄວາມປອດໄພຂອງປະເທດອ້ອມຂ້າງ, ການຍິງເທື່ອນີ້ໄດ້ນຳໃຊ້ວິທີການຍິງໃນມູມສູງ.
