ວັນທີ 13 ກຸມພານີ້, ສື່ມວນຊົນຕ່າງປະເທດລາຍງານວ່າ, ເຈົ້າໜ້າທີ່ອາເມລິກາໄດ້ຈັບຊາວຍົກຍ້າຍຖິ່ນຖານຢ່າງຜິດກົດໝາຍຫຼາຍຮ້ອຍຄົນໃນທົ່ວປະເທດເມື່ອອາທິດຜ່ານມາ ເຊິ່ງເປັນມາດຕະການ ຕໍ່ຊາວຍົກຍ້າຍຖິ່ນຖານຜູ້ບໍ່ມີໃບອະນຸຍາດຢ່າງຂະໜາດໃຫຍ່ເປັນຄັ້ງທຳອິດຂອງລັດຖະບານ ນັບແຕ່ທ່ານ ໂດນັນ ທຣຳ ດຳລົງຕຳແໜ່ງປະທານາທິບໍດີເປັນຕົ້ນມາ.
ທາງການອາເມລິກາບໍ່ໄດ້ເຜີຍໃຫ້ຮູ້ຈຳນວນຄົນທີ່ຖືກຈັບ ຂະນະທີ່ຜູ້ຮັບຜິດຊອບເຂດລອສອັນເຈີລິສຂອງສຳນັກງານຊາວຍົກຍ້າຍຖິ່ນຖານແລະດ່ານພາສີ ກ່າວວ່າ, ຢູ່ລອສແອນເຈີລິສ ສາມາດຈັບໄດ້ປະມານ 160 ຄົນ ເຊິ່ງໃນນັ້ນ 75% ເຄີຍຖືກກ່າວຫາຍ້ອນໄດ້ໂທດໜັກ, ແຕ່ກໍມີຈຳນວນໜຶ່ງຖືກຈັບພຽງແຕ່ຍ້ອນບໍ່ມີໃບອະນຸຍາດທີ່ຊອບດ້ວຍກົດໝາຍເທົ່ານັ້ນ.
ຂ່າວແຈ້ງອີກວ່າ, ການເຄື່ອນໄຫວດັ່ງກ່າວ ເຮັດໃຫ້ກຸ່ມຄົນຍົກຍ້າຍຖິ່ນຖານໃນທົ່ວປະເທດອາເມລິກາສະທ້ານຢ້ານກົວ ແລະສະມາຊິກສະພາທີ່ສັງກັດພັກເດໂມແກຼດນັ້ນ ຕ່າງກໍອອກມາຕຳໜິ. ແຕ່ທາງການກ່າວວ່າ, ນີ້ແມ່ນມາດຕະການ ປະຕິບັດກົດໝາຍທີ່ເປັນປົກກະຕິ ແລະຜູ້ຖືກຈັບສ່ວນຫຼາຍເຄີຍກະທຳຜິດໜັກ ແລະເປັນໄພຂົ່ມຂູ່ຕໍ່ຄວາມປອດໄພສາທາລະນະຫຼືກົນໄກການຍົກຍ້າຍຖິ່ນຖານ.