ແຫຼ່ງຂ່າວຈາກອົງການດັບເພີງເຂດໄຕ້ຫວັນໃຫ້ຮູ້ໃນເວລາປະມານ 0 ໂມງຂອງວັນທີ 14 ກຸມພານີ້ວ່າ: ໃນຕອນຄ່ຳວັນທີ 13 ກຸມພານີ້ ໄດ້ເກີດອຸບັດເຫດລົດນຳທ່ຽວປີ້ນ ສົ່ງຜົນເຮັດໃຫ້ 32 ຄົນເສຍຊີວິດ, ຂະນະທີ່ 12 ຄົນໄດ້ຮັບບາດເຈັບນັ້ນ ໄດ້ຖືກສົ່ງເຂົ້າປິ່ນປົວຢູ່ໂຮງໝໍແລ້ວ. ສ່ວນເຈົ້າໜ້າທີ່ຕຳຫຼວດທາງຫຼວງໄຕ້ຫວັນຢືນຢັນວ່າ ຢູ່ໃນລົດນຳທ່ຽວດັ່ງກ່າວບໍ່ມີນັກທ່ອງທ່ຽວຈາກແຜ່ນດິນໃຫຍ່ຈີນ.
ຫຼັງຕຳຫຼວດເຂົ້າໄປຊ່ວຍເຫຼືອຢູ່ຈຸດເກີດເຫດ ແລະຜ່ານການກວດກາເບື້ອງຕົ້ນໄດ້ຢືນຢັນວ່າ: ລົດນຳທ່ຽວດັ່ງກ່າວໄດ້ເກີດເຫດລະຫວ່າງທາງມຸ່ງໜ້າກັບເມືອງໄຕເປຫຼັງພານັກທ່ອງທ່ຽວໄປຊົມດອກສະກຸລະຢູ່ຟາມກະເສດອູຫຼິງ ໂດຍຄາດວ່າອາດຈະຂັບລົດໄວເກີນກຳນົດ ຈຶ່ງໄດ້ພຸ່ງຕຳຮາວແຄມທາງ ທັງປີ້ນແລະຕົກລົງຄ້ອຍແຄມທາງ, ຂະນະທີ່ໃນລົດສ່ວນຫຼາຍແມ່ນນັກທ່ອງທ່ຽວທີ່ມີອາຍຸກວ່າ 50 ປີ.
ເຈົ້າໜ້າທີ່ຂະແໜງທາງຫຼວງໄຕ້ຫວັນປະກາດວ່າ, ລົດຄັນນີ້ນຳໃຊ້ມາເປັນເວລາ 19 ປີແລ້ວ, ຂະນະດຽວກັນກໍຍັງບໍ່ສາມາດຢືນຢັນອັດຕະລັກຂອງຄົນຂັບໄດ້. ແນວໃດກໍດີ, ປັດຈຸບັນ ຂະແໜງການຄົມມະນາຄົມແລະໜ່ວຍງານດັບເພີງກຳລັງສືບສວນລາຍລະອຽດຂອງສາເຫດໃນການເກີດອຸບັດເຫດດັ່ງກ່າວ.
