ໂດຍປະຕິບັດຕາມຄຳສັ່ງແນະນຳຂອງລັດຖະມົນຕີກະຊວງອຸດສາຫະກຳ ແລະການຄ້າ ກ່ຽວກັບການຕິດສະຫຼາກສິນຄ້າເປັນພາສາລາວ ວັນທີ 10 ກຸມພາ 2017 ຜ່ານມາ ກະຊວງອຸດສາຫະກຳ ແລະການຄ້າ ໄດ້ສົມທົບກັບພະແນກອຸດສາ ຫະກຳ ແລະການຄ້າ.ນວ ພ້ອມພາກສ່ວນທີ່ກ່ຽວຂ້ອງ ລົງຕິດຕາມຊຸກຍູ້ການຕິດຕາມສະຫຼາກສິນຄ້າເປັນພາສາລາວຢູ່ນະຄອນຫຼວງວຽງຈັນ.
ການລົງຕິດຕາມຊຸກຍູ້ການຕິດສະຫຼາກສິນຄ້າຂອງຄະນະຄັ້ງນີ້ ເຊິ່ງນຳໂດຍທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າໄດ້ລົງຕິດຕາມຊຸກຍູ້ການຕິດສະຫຼາກສິນຄ້າຢູ່ 3 ບໍລິສັດ ຄື: ບໍລິສັດ ຊີໄອ ການຄ້າ ຂາອອກ-ຂາເຂົ້າ ຈຳກັດຜູ້ດຽວ ບໍລິສັດ ພອນສະຫວັນ ຂາອອກ-ຂາເຂົ້າ ຈຳກັດຜູ້ດຽວ ແລະບໍລິສັດ ສົມບູນການຄ້າ ຂາອອກ-ຂາເຂົ້າ ຈຳກັດຜູ້ດຽວ ຈຸດປະສົງຂອງການລົງຕິດຕາມຊຸກຍູ້ການຕິດສະຫຼາກສິນຄ້າເປັນພາສາລາວ ກໍ່ເພື່ອໃຫ້ຜູ້ສະໜອງສິນຄ້າທີ່ຜະລິດພາຍໃນ ແລະນຳເຂົ້າຈາກຕ່າງປະເທດ ເພື່ອຈຳໜ່າຍໃຫ້ມີສະຫຼາກເປັນພາສາລາວຕິດ ຖ້າວ່າສິນຄ້າໃດບໍ່ຕິດສະຫຼາກເປັນພາສາລາວຖືວ່າແຫຼ່ງທີ່ມາຂອງສິນຄ້ານັ້ນບໍ່ຖືກຕ້ອງຕາມລະບຽບກົດໝາຍ (ຍົກເວັ້ນສິນຄ້າທີ່ຖືກຍົກເວັ້ນການຕິດສະຫຼາກຕາມທີ່ກຳນົດໄວ້ໃນມາດຕາ 4 ຕາມຄຳສັ່ງຂອງລັດຖະມົນຕີກະຊວງອຸດສາຫະກຳ ແລະການຄ້າ).
ວິທີການຕິດສະຫຼາກສິນຄ້າແມ່ນຕ້ອງຕິດໃຫ້ແໜ້ນບໍ່ໃຫ້ຕົກເຮ່ຍໄດ້ງ່າຍ ແລະອ່ານໄດ້ສະດວກ ຕ້ອງຕິດໃສ່ຕົວສິນຄ້າ ພາຫະນະບັນຈຸ ຫິບຫໍ່ບັນຈຸສິນຄ້າແກັດ ຫຼື ຖັງ ແລະສາມາດຕິດກັບສະຫຼາກເດີມໄດ້ ສຳລັບຜູ້ຜະລິດພາຍໃນ ຜູ້ນຳເຂົ້າ ຜູ້ຂາຍ ຍົກຕົວແທນຈຳໜ່າຍ ແລະຂາຍຍ່ອຍສິນຄ້າທີ່ລະເມີດຄຳສັ່ງແມ່ນຈະຖືກກ່າວເຕືອນ ແລະເຮັດບົດບັນທຶກ ປັບໃໝ ໃຫ້ໂຈະ ຫຼື ຖອນໃບທະບຽນວິສາຫະກິດ ພ້ອມທັງຢຶດ ຫຼືອາຍັດສິນຄ້າດັ່ງກ່າວ.
 |
