ແຫຼ່ງຂ່າວຈາກສະຖາບັນວິທະຍາສາດຈີນໃຫ້ຮູ້ໃນວັນທີ 14 ກຸມພານີ້ວ່າ: ສະຖາບັນວິທະຍາສາດຈີນໄດ້ເລີ່ມຂະບວນການກະກຽມກໍ່ສ້າງສູນຮ່ວມມືການປະດິດສ້າງໃໝ່ຢູ່ນະຄອນຫຼວງບາງກອກປະເທດໄທດ້ວຍຄວາມຮັບຜິດຊອບສູງ ໂດຍທ່ານຈ່າງຢ້າຜິງ ຮອງຫົວໜ້າສະຖາບັນວິທະຍາສາດຈີນຈະເປັນຫົວໜ້າສະພາມົນຕີຊຸດທຳອິດຂອງສູນດັ່ງກ່າວ.
ທ່ານຈ່າງຢ້າຜິງ ກ່າວວ່າ: ສູນຮ່ວມມືການປະດິດສ້າງໃໝ່ຢູ່ບາງກອກແມ່ນອົງການທຳອິດທີ່ສະຖາບັນຂອງຕົນສ້າງຕັ້ງຂຶ້ນຢູ່ຕ່າງປະເທດເພື່ອຊຸກຍູ້ການຮ່ວມມືດ້ານການປະດິດສ້າງໃໝ່ລະຫວ່າງພາຍໃນແລະຕ່າງປະເທດລວມທັງການຖ່າຍທອດ ຫຼື ການປະຍຸກນຳໃຊ້ຜົນການປະດິດສ້າງວິທະຍາສາດເຕັກນິກຕົວຈິງ ແລະປະກອບສ່ວນເພື່ອຊຸກຍູ້ວິສາຫະກິດ, ອົງການຄົ້ນຄວ້າວິທະຍາສາດ ແລະ ມະຫາວິທະຍາໄລ ທີ່ຂຶ້ນກັບສະຖາບັນຂອງຕົນເຊື່ອມໂຍງເຂົ້າກັບປະຊາຄົມເສດຖະກິດອາຊຽນຢ່າງເລິກເຊິ່ງ ແລະ ການສ້າງປະຊາຄົມການປະດິດສ້າງໃໝ່ຈີນ-ອາຊຽນ.
ເມື່ອເດືອນທັນວາປີຜ່ານມາ, ທ່ານ ປາຍເຊິນຫຼີ ຫົວໜ້າສະຖາບັນວິທະຍາສາດຈີນ ແລະ ທ່ານ ພິເຊດ ດຸຣົງຄະເວໂຣດ ລັດຖະມົນຕີກະຊວງວິທະຍາສາດເຕັກນິກໄທ ໄດ້ຮ່ວມລົງນາມໃນບົດບັນທຶກຄວາມເຂົ້າໃຈການຮ່ວມມື ຢູ່ນະຄອນຫຼວງປັກກິ່ງ ໂດຍສະຖາບັນວິທະຍາສາດຈີນຈະກໍ່ສ້າງສູນຮ່ວມມືການປະດິດສ້າງໃໝ່ຢູ່ນະຄອນຫຼວງບາງກອກ ແລະ ໄທຈະສະໜັບສະໜູນໃຫ້ແກ່ການກໍ່ສ້າງແລະເຄື່ອນໄຫວຂອງສູນດັ່ງກ່າວ ໂດຍປິ່ນອ້ອມຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງລັດຖະບານຈີນ ແລະ ການປະຕິບັດ "ແຜນການແລວທາງເສດຖະກິດຕາເວັນອອກ" ຂອງລັດຖະບານໄທ.