ຕາມຂ່າວສານຊິນຮວາ: ເຄື່ອງເພີ່ມຄວາມຮ້ອນຄວາມດັນຕ່ຳທີ່ບໍລິສັດເຄື່ອງຈັກຂະໜາດໃຫຍ່ຕຸ່ງຟ່າງຕ້ຽນຊີ້ອອກແບບແລະຜະລິດນັ້ນ ໄດ້ສົ່ງອອກຜ່ານດ່ານກວາງໂຈວໃນວັນທີ 14 ກຸມພານີ້ ເຊິ່ງເຄື່ອງດັ່ງກ່າວຈະເອົາໄປປ່ຽນອຸປະກອນຂອງໂຮງໄຟຟ້ານິວເຄຼຍລະບົບ CP1 ຂອງກຸ່ມພະລັງໄຟຟ້າຝຣັ່ງ ແລະນີ້ເປັນຂີດໝາຍສະແດງໃຫ້ເຫັນວ່າ, ຂະແໜງການພະລັງໄຟຟ້ານິວເຄຼຍຂອງຈີນໄດ້ກ້າວໄປສູ່ການມີຄວາມສາມາດໃນການສົ່ງອອກໄປຕ່າງປະເທດແລ້ວ.
ທ່ານຟາໄບຼສ໌ ເຟົາໄຄດ໌ ຮອງປະທານ ທັງເປັນຜູ້ຕາງໜ້າກຸ່ມບໍລິສັດພະລັງໄຟຟ້າຝຣັ່ງກ່າວໃນພິທີສົ່ງອອກໃນມື້ດຽວກັນວ່າ, ນີ້ແມ່ນກຸ່ມພະລັງໄຟຟ້າຝຣັ່ງທີ່ໄດ້ສັ່ງຊື້ອຸປະກອນຈາກວິສາຫະກິດຈີນເປັນຄັ້ງທຳອິດເພື່ອເພີ່ມປະສິດທິພາບໃນການຜະລິດຂອງໂຮງໄຟຟ້ານິວເຄຼຍຝຣັ່ງ. ພ້ອມກັນນັ້ນ, ທ່ານຍັງໄດ້ມອບໃບອະນຸຍາດສະໜອງອຸປະກອນໃຫ້ວິສາຫະກິດຈີນ ເຊິ່ງເຮັດໃຫ້ວິສາຫະກິດດັ່ງກ່າວກາຍເປັນຜູ້ສະໜອງອຸປະກອນຜະລິດຕະພັນໄຟຟ້ານິວເຄຼຍທີ່ໄດ້ມາດຕະຖານແຫ່ງທຳອິດຢູ່ຈີນສຳລັບກຸ່ມພະລັງໄຟຟ້າຝຣັ່ງ.
 |
