ຕາມຂ່າວCRI: ເວລາ 9 ໂມງ 28 ນາທີຕອນເຊົ້າວັນທີ 15 ກຸມພາ, ອົງການຄົ້ນຄວ້າອະວະກາດອິນເດຍໄດ້ປະສົບຜົນສຳເລັດໃນການຍິງຈະຫຼວດສົ່ງຍານອິນເດຍ "PSLV-C37 " ຢູ່ສູນການບິນອະວະກາດເກາະສຣີຮາຣິໂກຕາ ລັດອັນດຼາ ທາງພາກຕາເວັນອອກສຽງໃຕ້ອິນເດຍ, ເຊິ່ງສາມາດສົ່ງຈະຫຼວດບັນທຸກດາວທຽມ 104 ໜ່ວຍ ແລະໄດ້ເຂົ້າສູ່ວົງໂຄຈອນໄດ້ທັງໝົດ.
ອົງການຄົ້ນຄວ້າອະວະກາດອິນເດຍໄດ້ປະກາດຫຼັງສຳເລັດການຍິງສົ່ງຈະຫຼວດບັນທຸກດາວທຽມຄັ້ງນີ້ວ່າສາມາດສ້າງສະຖິຕິໃໝ່ຂອງໂລກ ຄືໄດ້ທຳລາຍສະຖິຕິຂອງຣັດເຊຍທີ່ສົ່ງຈະຫຼວດບັນທຸກດາວທຽມ 37 ໜ່ວຍຂຶ້ນສູ່ອະວະກາດດ້ວຍຈະຫຼວດສົ່ງຍານໜ່ວຍດຽວໃນປີ 2014 ແລະກາຍເປັນປະເທດທີ່ໄດ້ຍິງສົ່ງດາວທຽມຫຼາຍທີ່ສຸດດ້ວຍຈະຫຼວດສົ່ງຍານໜ່ວຍດຽວຂອງໂລກ.