ຕາມຂ່າວສານຈີນ: ວັນທີ 15 ກຸມພານີ້, ທ່ານໂຈວຫົງໂປ ເຈົ້າຄອງນະຄອນໜານໜິງເຂດປົກຄອງຕົນເອງເຜົ່າຈ້ວງກວາງຊີກ່າວວ່າ, ໃນຖານະເປັນຕົວເມືອງແຖວໜ້າ ແລະໃຈກາງແຫ່ງການຮ່ວມມື ແລະເປີດປະຕູສູ່ປະເທດອາຊຽນຂອງຈີນ, ນະຄອນຂອງຕົນໄດ້ຕັ້ງໜ້າເຂົ້າຮ່ວມການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ຊຸກຍູ້ຈຸດທົດລອງຕົວແບບໃນແລວທາງເສດຖະກິດຈີນ-ແຫຼມອິນດູຈີນ, ຕັ້ງໜ້າເລັ່ງຍົກລະດັບ "ຊ່ອງທາງໜານໜິງ" ໃຫ້ສູງຂຶ້ນແລະມີປະສິດທິພາບ.
ທ່ານໂຈວຫົງໂປກ່າວວ່າ, ການກໍ່ສ້າງລະບົບທາງຄົມມະນາຄົມສັງລວມສາກົນໃນພາກພື້ນຂອງໜານໜິງໄດ້ມີບາດກ້າວໃໝ່ ໂດຍການເລັ່ງລັດກໍ່ສ້າງລົດໄຟໃຕ້ດິນ ແລະລານແລ່ນຊ່ອງທີສອງຂອງສະໜາມບິນອູຊີ, ເປີດນຳໃຊ້ທາງລົດໄຟໂດຍສານໜານໜິງ-ຄຸນມິງ ເປັນຕົ້ນ. ນອກນີ້, ສະຖານີລົດໄຟຕາເວັນອອກຂອງນະຄອນຕົນກໍໄດ້ກາຍເປັນໜຶ່ງໃນລະບົບທາງຄົມມະນາຄົມສັງລວມທີ່ໃຫຍ່ທີສຸດຢູ່ພາກໃຕ້ຈີນ.
ປັດຈຸບັນ, ນະຄອນໜານໜິງໄດ້ກາຍເປັນ "ຈຸດຕໍ່ລົດກາງທາງ" ແລະ "ແຫຼ່ງຜະລິດ" ສິນຄ້ານຳເຂົ້າສົ່ງອອກອາຊຽນ ແລະມີ 6 ປະເທດອາຊຽນໄດ້ສ້າງສະຖານກົງສູນ. ເຈົ້າໜ້າທີ່ອຳນາດການປົກຄອງໜານໜິງເປີດເຜີຍວ່າ ຈະເລັ່ງກໍ່ສ້າງສູນການທະນາຄານສາກົນໃນພາກພື້ນ, ເປີດກວ້າງການແລກປ່ຽນດ້ານວັດທະນະທຳ, ຍາດແຍ່ງການສ້າງຕັ້ງມະຫາວິທະຍາໄລຈີນ-ອາຊຽນຢູ່ນະຄອນຂອງຕົນ.
 |
