ທ່ານນາງແອງເຈີລາ ເມີແຄວ ນາຍົກລັດຖະມົນຕີເຢຍລະມັນ ໄດ້ຕອບກະທູ້ຂອງຄະນະສຳຫຼວດເຫດການຕິດຕາມລັກຟັງ ລັດຖະສະພາສະຫະພັນເຢຍລະມັນໃນວັນທີ 16 ກຸມພານີ້ວ່າ: ຫຼັງສື່ມວນຊົນເປີດເຜີຍກໍລະນີທີ່ກົມຂ່າວລັບສະຫະພັນເຢຍລະມັນຕິດຕາມລັກຟັງປະເທດພັນທະມິດແລ້ວ ຕົນຈຶ່ງຮູ້, ສະນັ້ນ ຕົນບໍ່ມີຄວາມຜິດແຕ່ຢ່າງໃດ ແລະກໍບໍ່ໄດ້ຫຼອກລວງປະຊາຊົນໃນເຫດການດັ່ງກ່າວ.
ສື່ມວນຊົນໄດ້ເປີດເຜີຍເມື່ອປີ 2015 ວ່າ ອົງການຂ່າວລັບເຢຍລະມັນໄດ້ຕິດຕາມລັກຟັງປະເທດພັນທະມິດ ເຊິ່ງເລື່ອງນີ້, ທ່ານນາງເມີແຄວ ໄດ້ຕອບກະທູ້ຖາມຂອງຄະນະສຳຫຼວດວ່າ: ຕົນບໍ່ຮູ້ເລື່ອງນີ້ແຕ່ປະການໃດ ແລະຫຼັງໄດ້ຮູ້ແລ້ວ ກໍສະເໜີຄວາມຮຽກຮ້ອງທາງການເມືອງໄປຍັງຂະແໜງທີ່ກ່ຽວຂ້ອງ ເພື່ອສະກັດກັ້ນການກະທຳທີ່ບໍ່ຊອບທຳດັ່ງກ່າວ ທັງຮັບປະກັນບໍ່ໃຫ້ເກີດເລື່ອງທີ່ມີລັກສະນະຄ້າຍຄືກັນອີກໃນຕໍ່ໜ້າ.
