ຕາມຂ່າວສານຊິນຮວາ: ເຈົ້າໜ້າທີ່ຕຳຫຼວດເມືອງເຊເຮິວານແຂວງຊິນດ໌ ພາກໃຕ້ປາກີສະຖານໃຫ້ຮູ້ວ່າ, ເຫດລະເບີດແບບສະຫຼະຊີບທີ່ເກີດຂຶ້ນຢູ່ສຸເຫຼົ່າແຫ່ງໜຶ່ງໃນຕອນກາງຄືນວັນທີ 16 ກຸມພານີ້ ສົ່ງຜົນເຮັດໃຫ້ 72 ຄົນເສຍຊີວິດ ແລະ 200 ກວ່າຄົນບາດເຈັບ.
ເຈົ້າໜ້າທີ່ສາທາລະນະສຸກເມືອງເຊເຮິວານກ່າວວ່າ, ໃນຈຳນວນຜູ້ເສຍຊີວິດແລະບາດເຈັບມີແມ່ຍິງແລະເດັກນ້ອຍຢ່າງຫຼວງຫຼາຍ ແລະເນື່ອງຈາກມີຜູ້ບາດເຈັບເປັນຈຳນວນຫຼາຍ, ຈຶ່ງໄດ້ໃຊ້ຍົນເຮລີກົບແຕສົ່ງຈຳນວນໜຶ່ງໄປເມືອງໄຮເດີຣາບັດ ແລະກາຣາຊີ. ຂະນະທີ່ເຈົ້າໜ້າທີ່ຕຳຫຼວດຂັ້ນສູງຜູ້ໜຶ່ງຂອງເຂດເຊເຮີວານກ່າວວ່າ, ຜູ້ໂຈມຕີແບບສະຫຼະຊີບໄດ້ເຂົ້າປະຕູສຸເຫຼົ່າດັ່ງກ່າວ ແລ້ວດຶງສະນວນລະເບີດທີ່ຕິດຕົວ ຂະນະທີ່ໃນສະຖານທີ່ດັ່ງກ່າວມີປະມານ 500-800 ຄົນ.
ກຸ່ມຫົວຮຸນແຮງ IS ໄດ້ກ່າວຮັບຜິດຊອບຕໍ່ການຫຼອນໂຈມຕີຄັ້ງນີ້.