ຕາມຂ່າວສານຊິນຮວາ: ທ່ານ ນີໂຄໄລ ມູລາເດີນົຟ ຜູ້ປະສານງານພິເສດຂະບວນການສັນຕິພາບຕາເວັນອອກກາງຂອງອົງການສະຫະປະຊາຊາດ ກ່າວເນັ້ນໃນກອງປະຊຸມສະພາຄວາມໝັ້ນຄົງເມື່ອວັນທີ 16 ກຸມພານີ້ວ່າ, "ແຜນການສ້າງເປັນສອງປະເທດ" ຍັງແມ່ນເສັ້ນທາງໜຶ່ງດຽວຂອງປະຊາຊົນສອງປະເທດປາແລັສຕິນແລະອິດສະລາແອນໃນການບັນລຸຄວາມປາຖະໜາສ້າງຕັ້ງປະເທດທີ່ຊອບດ້ວຍກົດໝາຍ.
ວັນທີ 15 ກຸມພານີ້, ທ່ານ ໂດນັນ ທຣຳ ປະທານາທິບໍດີອາເມລິກາ ໄດ້ກ່າວໃນການຖະແຫຼງຂ່າວຮ່ວມກັບທ່ານ ເນຕັນຢາຮູ ນາຍົກລັດຖະມົນຕີອິດສະລາແອນທີ່ເດີນທາງຢ້ຽມຢາມອາເມລິກາວ່າ, ຂໍພຽງແຕ່ສອງຝ່າຍປາແລັສຕິນແລະອິດສະລາແອນຍິນດີ, ກໍຈະສະໜັບສະໜູນທັງ "ແຜນການສ້າງເປັນປະເທດດຽວ" ແລະ "ສ້າງເປັນສອງປະເທດ" ເພື່ອບັນລຸສັນຕິພາບ.
ສ່ວນທ່ານ ອັບບັສ ປະທານາທິບໍດີປາແລັສຕິນ ໄດ້ຖະແຫຼງໃນວັນທີ 16 ກຸມພານີ້ວ່າ, ຈະຍຶດໝັ້ນແລະບໍ່ປະ "ແຜນການສ້າງເປັນສອງປະເທດ", ຂະນະທີ່ທ່ານ ອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດ ກໍໄດ້ກ່າວຢູ່ນະຄອນຫຼວງເລີແກໃນວັນທີ 15 ກຸມພານີ້ວ່າ, ບັນຫາປາແລັສຕິນແລະອິດສະລາແອນ, ນອກຈາກແຜນການສ້າງເປັນສອງປະເທດແລ້ວ, ບໍ່ມີທາງເລືອກອື່ນໃດອີກແລ້ວ.
 |
