ຕາມຂ່າວCRI: ວັນທີ 17 ກຸມພານີ້, ພະນັກງານອະນາໄມແຂວງສິນຂອງປາກີສະຖານກ່າວວ່າ, ການຫຼອນໂຈມຕີກໍ່ການຮ້າຍແບບຂ້າຕົວຕາຍທີ່ເກີດຂຶ້ນຢູ່ສຸເຫຼົ່າເຂດເຊເຫີວານໃນຕອນແລງວັນທີ 16 ກຸມພານີ້ໄດ້ເຮັດໃຫ້ມີຜູ້ເສຍຊີວິດ 88 ຄົນ, ແລະ 343 ຄົນບາດເຈັບ.ປັດຈຸບັນນີ້ຜູ້ບາດເຈັບໜັກໄດ້ຮັບການປິ່ນປົວຢູ່ໂຮງໝໍແລ້ວ, ແລະຄາດວ່າຜູ້ເສຍຊີວິດອາດຈະເພີ່ມຂຶ້ນອີກ. ອົງການປົກຄອງທ້ອງຖິ່ນຂອງແຂວງສິນໄດ້ປະກາດໃຫ້ວັນທີ 17 ຫາ ວັນທີ 19 ກຸມພານີ້ເປັນວັນໄວ້ອາໄລຢ່າງເປັນທາງການ, ແລະໄດ້ຊັກທຸງຊາດລົງເຄິ່ງເສົາເພື່ອໄວ້ອາໄລຕໍ່ຜູ້ເສຍຊີວິດ.
ກອງທັບຂອງປາກີສະຖານໄດ້ປະຕິບັດການກວາດລ້າງໃນຂອບທົ່ວປະເທດນັບແຕ່ວັນທີ 17 ກຸມພານີ້ເປັນຕົ້ນມາ, ໄດ້ສັງຫານຜູ້ປະກອບອາວຸດ 37 ຄົນ, ແລະຈັບຕົວຜູ້ຖືກສົງໄສປະມານ 200 ຄົນ. ພ້ອມກັນນັ້ນ, ໃນທົ່ວປະເທດ, ກໍ່ໄດ້ເພີ່ມກຳລັງປ້ອງກັນຄວາມປອດໄພ, ແລະສຸເຫຼົ່າຕ່າງໆຖືກປິດເປັນການຊົ່ວຄາວ.
ທ່ານສີຈີນຜິງ, ປະທານປະເທດຈີນໄດ້ສົ່ງໂທລະເລກໄປຍັງທ່ານມານູນ ຫູຊາອິນ, ປະທານາທິບໍດີປາກະສະຖານໃນວັນທີ 17 ກຸມພານີ້, ທ່ານໄດ້ສະແດງຄວາມຢື້ຢາມຖາມຂ່າວຕໍ່ເຫດການຫຼອນໂຈມຕີກໍ່ການຮ້າຍຢ່າງຮຸນແຮງໃນຄັ້ງນີ້ແລະກ່າວວ່າ, ຈີນຄັດຄ້ານຕໍ່ລັດທິກໍ່ການຮ້າຍບໍ່ວ່າດ້ວຍຮູບການໃດໆ, ພ້ອມທັງກ່າວປະນາມຢ່າງຮຸນແຮງຕໍ່ເຫດການຫຼອນໂຈມຕີກໍ່ການຮ້າຍນີ້. ຈີນຈະສືບຕໍ່ຍຶດໝັ້ນສະໜັບສະໜູນຄວາມພະຍາຍາມຂອງປາກີສະຖານເຂົ້າໃນການຕ້ານລັດທິກໍ່ການຮ້າຍ, ການປົກປ້ອງຄວາມມີສະຖຽນລະພາບຂອງປະເທດແລະການປົກປັກຮັກສາຄວາມປອດໄພຂອງປະຊາຊົນ.