ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ພົບປະກັບທ່ານຢຸນບິງເຊ ລັດຖະມົນຕີກະຊວງການຕ່າງປະເທດ ສ.ເກົາຫຼີໃນວັນທີ 18 ກຸມພານີ້ ຂະນະທີ່ເຂົ້າຮ່ວມກອງປະຊຸມນະໂຍບາຍຄວາມໝັ້ນຄົງມິວນິກຄັ້ງທີ 53.
ທ່ານຫວາງຢີ້ ກ່າວວ່າ: ປີນີ້ແມ່ນປີຄົບຮອບ 25 ປີແຫ່ງການສ້າງຕັ້ງສາຍພົວພັນທາງການທູດລະຫວ່າງຈີນ ແລະ ສ.ເກົາຫຼີ ພວກເຮົາຄວນທະນຸຖະໜອມຜົນໄດ້ຮັບອັນລ້ຳຄ່າໃນການພົວພັນລະຫວ່າງສອງປະເທດ, ພະຍາຍາມກຳຈັດສິ່ງລົບກວນທີ່ມີຢູ່ໃນປັດຈຸບັນ ແລະ ເຮັດໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງຝ່າຍພັດທະນາຢ່າງປອດໃສ.
ນອກນີ້, ທ່ານຫວາງຢີ້ ຍັງໄດ້ກ່າວຢ້ຳຫຼັກໝັ້ນຂອງຈີນອີກເທື່ອໜຶ່ງໃນການຄັດຄ້ານການຕິດຕັ້ງລະບົບແທດ (THAAD) ຢູ່ ສ.ເກົາຫຼີ ທັງເນັ້ນວ່າ, ຄວາມໝັ້ນຄົງຂອງປະເທດໃດໜຶ່ງບໍ່ຄວນສ້າງຕັ້ງຂຶ້ນຢູ່ບົນພື້ນຖານທີ່ທຳລາຍຄວາມໝັ້ນຄົງຂອງປະເທດອື່ນ. ແນວໃດກໍດີ, ຈີນເຂົ້າໃຈຄວາມຕ້ອງການຂອງ ສ.ເກົາຫຼີ ໃນການປົກປັກຮັກສາຄວາມໝັ້ນຄົງຂອງປະເທດຕົນ, ແຕ່ຂະນະດຽວກັນ ສ.ເກົາຫຼີ ກໍຄວນເຄົາລົບຫຼັກໝັ້ນອັນຊອບທຳຂອງຈີນເຊັ່ນດຽວກັນ.
ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບສະຖານະການຢູ່ແຫຼມເກົາຫຼີອີກດ້ວຍ ທ່ານຫວາງຢີ້ ກ່າວວ່າ: ປັດຈຸບັນ, ສະຖານະການຢູ່ແຫຼມເກົາຫຼີນັບມື້ສັບສົນແລະຂ້ຽວຂາດ ແຕ່ພວກເຮົາກໍບໍ່ຄວນປະລະຄວາມພະຍາຍາມເພື່ອສັນຕິພາບ. ຂະນະທີ່ຝ່າຍຕ່າງໆປະຕິບັດຕາມມະຕິຕົກລົງຂອງສະພາຄວາມໝັ້ນຄົງອົງການສະຫະປະຊາຊາດຢ່າງເຂັ້ມງວດນັ້ນ, ກໍຄວນຕັ້ງໜ້າຊອກຫາຊ່ອງທາງບຸກທະລຸເພື່ອຟື້ນຟູການເຈລະຈາຄືນໃໝ່ ແລະບໍ່ໃຫ້ບັນຫານິວເຄລຍຢູ່ແຫຼມເກົາຫຼີຕົກຢູ່ໃນວົງວຽນທີ່ຜັນແປໄປໃນທາງລົບ.