ເຈົ້າໜ້າທີ່ຂະແໜງຂ່າວລັບໂຊມາລີ ຢືນຢັນໃນວັນທີ 19 ກຸມພານີ້ວ່າ: ຢູ່ຕະຫຼາດແຫ່ງໜຶ່ງ ນະຄອນຫຼວງໂມກາດີຊູ ປະເທດຕົນ ໄດ້ເກີດເຫດຫຼອນໂຈມຕີດ້ວຍລະເບີດລົດຍົນໃນວັນດັ່ງກ່າວ ສົ່ງຜົນເຮັດໃຫ້ຢ່າງໜ້ອຍ 30 ຄົນເສຍຊີວິດ ແລະ ຫຼາຍຄົນໄດ້ຮັບບາດເຈັບ.
ທັງນີ້, ເຈົ້າໜ້າທີ່ກົມຂ່າວລັບແລະຄວາມໝັ້ນຄົງແຫ່ງຊາດໂຊມາລີ ໄດ້ບອກນັກຂ່າວວ່າ: ເຫດດັ່ງກ່າວໄດ້ເກີດຂຶ້ນຢູ່ຕະຫຼາດແຫ່ງໜຶ່ງ ເມືອງວາດາຈີ ນະຄອນຫຼວງໂມກາດີຊູ ຂະນະທີ່ມີຄົນຢ່າງໜາແໜ້ນ ສົ່ງຜົນເຮັດໃຫ້ທະຫານແລະປະຊາຊົນຫຼາຍຄົນໄດ້ຮັບບາດເຈັບ ແລະໃນຈຳນວນຜູ້ເສຍຊີວິດນັ້ນສ່ວນຫຼາຍແມ່ນແມ່ຍິງ ແລະ ເດັກນ້ອຍ. ປັດຈຸບັນ, ຜູ້ໄດ້ຮັບບາດເຈັບກໍຖືກສົ່ງໄປປິ່ນປົວຢູ່ໂຮງໝໍໃກ້ບໍລິເວນນັ້ນແລ້ວ ແລະເນື່ອງຈາກແຮງລະເບີດແຮງສົມຄວນ ຄາດວ່າຈຳນວນຜູ້ເສຍຊີວິດແລະບາດເຈັບອາດຈະເພີ່ມຂຶ້ນອີກ.
ປັດຈຸບັນ ຍັງບໍ່ທັນມີອົງການໃດອອກມາກ່າວອ້າງຄວາມຮັບຜິດຊອບເຫດການດັ່ງກ່າວເທື່ອ, ແຕ່ກ່ອນໜ້ານີ້, "ພັກຊາວໜຸ່ມ" ເຊິ່ງເປັນກຸ່ມຫົວຮຸນແຮງໂຊມາລີທີ່ມີສ່ວນກ່ຽວຂ້ອງກັບກຸ່ມອານ ເຄດາ ໄດ້ກໍ່ເຫດການໃນລັກສະນະຄ້າຍຄືກັນເລື້ອຍໆ.
