ຕາມຂ່າວສານຈີນ:ໃນໄລຍະເຂົ້າຮ່ວມກອງປະຊຸມລັດຖະມົນຕີການຕ່າງປະເທດກຸ່ມ 20 ປະເທດກ່ອນໜ້ານີ້,ທ່ານຫວັງຢີ້ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານເຣັດໂນ ມາຊູດີ ລັດຖະມົນຕີກະຊວງການຕ່າງປະເທດອິນໂດເນເຊຍຢູ່ເມືອງບອນປະເທດເຢຍລະມັນ.
ທ່ານຫວັງຢີ້ກ່າວວ່າ,ອິນໂດເນເຊຍແມ່ນປະເທດສຳຄັນລຽບຕາມ "ເສັ້ນທາງສາຍໄໝທາງທະເລສະຕະວັດທີ 21"ແລະຈາກນີ້ທັງສອງປະເທດຄວນເຊື່ອມຕໍ່ຍຸດທະສາດການພັດທະນາຕື່ມອີກເພື່ອບັນລຸການພ້ອມກັນພັດທະນາ.ຂະນະດຽວກັນກໍຫວັງວ່າສອງຝ່າຍຈະຮ່ວມກັນຊຸກຍູ້ທາງລົດໄຟຄວາມໄວສູງຈາກາຕາ-ບັນດຸງທີ່ເປັນໂຄງການຂີດໝາຍແຫ່ງການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ.
ທ່ານເຣັດໂນກ່າວວ່າ,ການພົວພັນອິນໂດເນເຊຍແລະຈີນໄດ້ຮັບການຊຸກຍູ້ສົ່ງເສີມດີຫຼາຍເຊິ່ງ ອິນໂດເນເຊຍມີຄວາມປາຖະໜາອັນແຮງກ້າໃນການພັດທະນາການພົວພັນສອງປະເທດຢ່າງຮອບດ້ານແລະຍິນດີລົງເລິກກົນໄກສົນທະນາທີ່ມີໃນປັດຈຸບັດກັບຈີນເພື່ອເຊື່ອມຕໍ່ຍຸດທະສາດ "ຈຸດເສົາຄ້ຳທາງທະເລທົ່ວໂລກ"ຂອງອິນໂດເນເຊຍກັບຂໍ້ລິເລີ່ມ "ເສັ້ນທາງສາຍໄໝທາງທະເລ"ຂອງຈີນໃຫ້ດີກວ່າເກົ່າທັງຍົກສູຸງຄຸນນະພາບແລະລະດັບການຮ່ວມມືຂອງສອງປະເທດໃນຂົງເຂດການລົງທຶນ,ກະສິກຳ,ທະເລແລະອື່ນໆຕື່ມອີກ.
ນອກນີ້,ລັດຖະມົນຕີການຕ່າງປະເທດສອງປະເທດຍັງໄດ້ແລກປ່ຽນຄວາມເຫັນກ່ຽວກັບບັນຫາໃນການຫາລື "ກົດແຫ່ງການປະພຶດຢູ່ທະເລຈີນໃຕ້".