ວັນທີ 20 ກຸມພານີ້, ເຈົ້າໜ້າທີ່ຕຳຫຼວດໄທໄດ້ຄວບຄຸມວັດພະທຳມະກາຍ ແລະຫວັງຈະຈັບອະດີດເຈົ້າອາວາດທີ່ຖືກສົງໄສມີການກະທຳຟອກເງິນ ແລະ ຮັບສິນບົນ ໂດຍເຈົ້າໜ້າທີ່ຕຳຫຼວດຮຽກຮ້ອງໃຫ້ພະສົງໃນວັດດັ່ງກ່າວອອກຈາກວັດຊົ່ວຄາວ ເພື່ອກວດຄົ້ນຜູ້ຕ້ອງສົງໄສ ຄື ອະດີດເຈົ້າອາວາດວັດ, ແຕ່ການກວດຄົ້ນຂອງເຈົ້າໜ້າທີ່ຕຳຫຼວດພັດຖືກພຸດທະສາສະນິກະຊົນນັບເປັນໝື່ນຄົນກີດກັ້ນ.
ໂຄສົກວັດພະທຳມະກາຍ ກ່າວວ່າ: ຕົນໄດ້ປະສານສົມທົບວຽກແຕ່ລະກ້າວກັບລັດຖະບານຢ່າງແໜ້ນແຟ້ນ, ແຕ່ລັດຖະບານບໍ່ຄວນເຂົ້າແຊກແຊງວຽກງານສາສະໜາ. ພວກເຮົາຮຽກຮ້ອງໃຫ້ເຈົ້າໜ້າທີ່ຈົ່ງຢຸດໃຊ້ມາດຕາ 44 ແລະຖອນຕຳຫຼວດອອກຈາກບໍລິເວນວັດ.
ຂະນະທີ່ເຈົ້າໜ້າທີ່ຕຳຫຼວດໄດ້ຕອບໂຕ້ໃນວັນທີ 19 ກຸມພານີ້ວ່າ: ການກະທຳຂອງວັດໄດ້ກະທົບຕໍ່ການກວດຄົ້ນຂອງເຈົ້າໜ້າທີ່, ຂະນະທີ່ພວກເຮົາກວດຄົ້ນກໍເພື່ອໃຫ້ສຳເລັດໂດຍໄວ ແລະມອບວັດຄືນໃຫ້ສາສະນິກະຊົນ. ແນວໃດກໍດີ, ເຈົ້າໜ້າທີ່ຕຳຫຼວດໄດ້ກວດຄົ້ນແຕ່ລະຫ້ອງຂອງວັດແລ້ວ, ແຕ່ບໍ່ໄດ້ພົບພະທຳມະຊະໂຍ, ແຕ່ກໍຈະສືບຕໍ່ກວດຄົ້ນຢູ່ເຂດອ້ອມແອ້ມວັດຕໍ່ໄປ.
