ທ່ານກາວຮູເສິງ ລັດຖະມົນຕີກະຊວງການຄ້າຈີນ ກ່າວໃນພິທີຖະແຫຼງຂ່າວຂອງຫ້ອງການຖະແຫຼງຂ່າວລັດຖະບານຈີນໃນວັນທີ 21 ກຸມພານີ້ວ່າ: ປະເທດຕົນຢຸດຕິການນຳເຂົ້າຖ່ານຫີນຈາກ ສປປ ເກົາຫຼີ ຊົ່ວຄາວ ເພື່ອປະຕິບັດຕາມພັນທະສາກົນ ແລະສອດຄ່ອງກັບກົດໝາຍທີ່ກ່ຽວຂ້ອງຂອງຈີນ.
ທັງນີ້, ກະຊວງການຄ້າແລະອົງການດ່ານພາສີແຫ່ງຊາດຈີນ ໄດ້ຖະແຫຼງຫວ່າງມໍ່ໆນີ້ວ່າ: ປະຕິບັດຕາມມະຕິຕົກລົງເລກທີ 2321 ຂອງສະພາຄວາມໝັ້ນຄົງອົງການສະຫະປະຊາຊາດ ແລະ ອີງຕາມ "ກົດໝາຍວ່າດ້ວຍການຄ້າກັບຕ່າງປະເທດສາທາລະນະລັດປະຊາຊົນຈີນ" ພ້ອມດ້ວຍແຈ້ງການເລກທີ 81 ປີ 2016 ຂອງກະຊວງການຄ້າ ແລະ ອົງການດ່ານພາສີແຫ່ງຊາດ, ປີນີ້ຈະຢຸດຕິການນຳເຂົ້າຖ່ານຫີນທີ່ຜະລິດຢູ່ ສປປ ເກົາຫຼີ ຊົ່ວຄາວ ລວມທັງຖ່ານຫີນທີ່ໄດ້ແຈ້ງດ່ານພາສີ, ແຕ່ຍັງບໍ່ທັນປະກອບເອກະສານສຳເລັດ ໂດຍເລີ່ມປະຕິບັດນັບແຕ່ວັນທີ 19 ກຸມພານີ້ ໄປຈົນເຖິງວັນທີ 31 ທັນວາປີນີ້.
