ໃນໂອກາດແຈ້ງຜົນສຳເລັດຂອງກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 50 ໃນວັນທີ 21 ກຸມພານີ້, ທ່ານເປີເຟັກໂຕ ຢາໄຊ ລັດຖະມົນຕີກະຊວງການຕ່າງປະເທດຟີລິບປິນກ່າວວ່າ: ກອງປະຊຸມຄັ້ງນີ້ໄດ້ເນັ້ນໃຫ້ຈັດຕັ້ງປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້ຢ່າງມີປະສິດທິຜົນແລະຮອບດ້ານແລະພະຍາຍາມຮ່ວມກັບຈີນສ້າງຂອບ ຂອງ"ກົດແຫ່ງການປະພຶດຢູ່ທະເລຈີນໃຕ້"ໃຫ້ສຳເລັດໃນກາງປີນີ້ເພື່ອສ້າງພື້ນຖານທີ່ດີໃຫ້ແກ່ກົດດັ່ງກ່າວ.
ທ່ານຢາໄຊຢືນຢັນໃນພິທີຖະແຫຼງຂ່າວຫຼັງກອງປະຊຸມວ່າ: ບັນດາຝ່າຍເຫັນດີສືບຕໍ່ເພີ່ມຄວາມໄວ້ເນື້ອເຊື່ອໃຈກັນລະຫວ່າງປະເທດທີ່ກ່ຽວຂ້ອງເພື່ອແກ້ໄຂບັນຫາດັ່ງກ່າວດ້ວຍສັນຕິວິທີ ຂະນະທີ່ຟີລິບປິນເຫັນວ່າ ປັດຈຸບັນຄວນໂຈະຜົນການຕັດສິນບັນຫາທະເລຈີນໃຕ້ຂອງສານອະນຸຍາໂຕຕຸລາການ ແລະບັນຫາທະເລຈີນໃຕ້ເປັນສ່ວນໜຶ່ງຂອງສາຍພົວພັນຟີລິບປິນ-ຈີນເທົ່ານັ້ນ, ຂະນະດຽວກັນທັງຟີລິບປິນແລະຈີນຄວນສຸມໃສ່ຈຸດຮ່ວມດ້ານຜົນປະໂຫຍດແຫ່ງຊາດຂອງສອງປະເທດແລະກະທຳໃນສິ່ງທີ່ສ້າງຜົນປະໂຫຍດໃຫ້ແກ່ປະຊາຊົນສອງຊາດ.
ທ່ານຢາໄຊກ່າວຕື່ມວ່າ: ບັນດາລັດຖະມົນຕີການຕ່າງປະເທດທີ່ເຂົ້າຮ່ວມກອງປະຊຸມໄດ້ປຶກສາຫາລືບັນຫາສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນຕົນແລະສາກົນ ລວມທັງການຕໍ່ຕ້ານລັດທິກໍ່ການຮ້າຍ,ໂຈນສະຫຼັດ,ການຄ້າມະນຸດ,ຢາເສບຕິດ, ຄວາມໝັ້ນຄົງທາງອິນເຕີເນັດ,ການປ່ຽນແປງຂອງດິນຟ້າອາກາດ,ຄວາມໝັ້ນຄົງແລະການຮ່ວມມືທາງທະເລແລະອື່ນໆ.ນອກນີ້ຍັງໄດ້ຫາລືສະຖານະການຢູ່ຕາເວັນອອກກາງ,ແຫຼມເກົາຫຼີແລະເຂດທະເລຈີນໃຕ້ອີກດ້ວຍ.
 |
