ທ່ານຫຼິວເຈຢີ່ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດກ່າວໃນວັນທີ 21 ກຸມພານີ້ວ່າ: ການປະຕິບັດໜ້າທີ່ຮັກສາສັນຕິພາບພ້ອມດ້ວຍສະພາບແວດລ້ອມການປະຕິບັດໜ້າທີ່ຂອງອົງການສະຫະປະຊາຊາດນັບມື້ນັບສັບສົນ,ຈາກນີ້, ລະບົບຮັກສາສັນຕິພາບຕ້ອງກ້າວໜ້າໄປພ້ອມຍຸກສະໄໝເພື່ອສອດຄ່ອງກັບການປ່ຽນແປງຂອງສະຖານະການແລະຄວາມຕ້ອງການຕົວຈິງໃຫ້ດີກວ່າເກົ່າ. ກອງເລຂາອົງການສະຫະປະຊາຊາດໃນຖານະເປັນຜູ້ຄຸ້ມຄອງການເຄື່ອນໄຫວຮັກສາສັນຕິພາບ ຄວນພິຈາລະນາເຖິງສະພາບກວມລວມແລະອະນາຄົດຂອງການເຄື່ອນໄຫວຮັກສາສັນຕິພາບໂດຍໃຫ້ເອົາໃຈໃສ່ສະຫຼຸບແລະຖອດຖອນບົດຮຽນເພື່ອເຮັດໃຫ້ການເຄື່ອນໄຫວຮັກສາສັນຕິພາບມີປະສິດທິຜົນຫຼາຍຂຶ້ນແລະຍົກສູງຄວາມສາມາດໃນການຮັບມືກັບສະພາບທີ່ສັບສົນ.
ກ່ຽວກັບການພັດທະນາໃນອະນາຄົດຂອງການເຄື່ອນໄຫວຮັກສາສັນຕິພາບ,ທ່ານຫຼິວເຈຢີ່ກ່າວໃນກອງປະຊຸມຄະນະກຳມະການພິເສດຮັກສາສັນຕິພາບສະມັດຊາໃຫຍ່ອົງການສະຫະປະຊາຊາດໃນວັນທີ 21 ກຸມພານີ້ວ່າ: ຄວນເຄົາລົບຈຸດປະສົງແລະຫຼັກການຂອງກົດບັດສະຫະປະຊາຊາດແລະ 3 ຫຼັກການແຫ່ງການຮັກສາສັນຕິພາບ, ກຳນົດການມອບສິດຢ່າງຈະແຈ້ງ,ປະຕິບັດໄດ້ແລະເນັ້ນໜັກຈຸດສຸມໃຫ້ແກ່ຄະນະແຕ່ງຕັ້ງພິເສດເພື່ອຮັກສາສັນຕິພາບ ທັງເພີ່ມຄວາມສາມາດຂອງກອງກຳລັງຮັກສາສັນຕິພາບໃນການເຕືອນໄພແລະປົກປັກຮັກສາຄວາມປອດໄພ.
 |
