ທ່ານພູຂົງ ຈັນທະຈັກ ຜູ້ອຳນວຍການທະນາຄານການຄ້າຕ່າງປະເທດລາວມະຫາຊົນກ່າວວ່າ, ການຮ່ວມມືລະຫວ່າງທະນາຄານຕົນແລະ BOC ເປັນຂີດໝາຍໃໝ່ທີ່ສຳຄັນຕໍ່ການຮ່ວມມືໃນຫຼາຍດ້ານເຊັ່ນ: ການຮ່ວມມືບໍລິການລູກຄ້າ, ການເຮັດທຸລະກິດຮ່ວມ, ການສ້າງຄວາມເຂັ້ມແຂງໃຫ້ແກ່ຊັບພະຍາກອນມະນຸດແລະອື່ນໆເພື່ອອຳນວຍຄວາມສະດວກແລະສາມາດຕອບສະໜອງຄວາມຮຽກຮ້ອງຕ້ອງການຂອງລູກຄ້າລາວຫຼືບຸກຄົນແລະບໍລິສັດຈາກ ສປ ຈີນໂດຍສະເພາະໃນໂຄງການທາງລົດໄຟລາວ-ຈີນ. ທີ່ສຳຄັນຈະສ້າງຜົນປະໂຫຍດສູງສຸດໃຫ້ແກ່ທັງສອງທະນາຄານແລະສາມາດປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມຂອງ ສປປ ລາວພ້ອມທັງຜັນຂະຫຍາຍການຮ່ວມມືລະຫວ່າງລາວ-ຈີນ.
ທ່ານອຸຊືສຽງ, ຜູ້ອຳນວຍການໃຫຍ່ຮັບຜູດຊອບລູກຄ້າສະຖາບັນການເງິນທະນາຄານ BOC ກ່າວວ່າ, ການລົງນາມໃນສັນຍາເທື່ອນີ້, ທັງສອງທະນາຄານຕ່າງຈະເສີມຂະຫຍາຍທ່າແຮງຂອງຕົນ, ເພື່ອບໍລິການໃຫ້ແກ່ໂຄງການຂະໜາດໃຫຍ່ໃນລາວ, ການຊຳລະສະສາງເປັນສະກຸນເງິນຢວນ, ການສະໜອງເງິນສົດ, ການປ່ອຍເງິນກູ້ຮ່ວມແລະສ້າງໂອກາດການຮ່ວມມືໃນຕໍ່ໜ້າລວມທັງເປັນການເພີ່ມທະວີການຮ່ວມມືເສດຖະກິດການຄ້າລະຫວ່າງສອງປະເທດຈີນ-ລາວຕື່ມອີກ.
