ວັນທີ 22 ກຸມພານີ້ຢູ່ຫໍສະພາປະຊາຊົນຈີນ, ພາຍຫຼັງທ່ານສີຈິ້ນຜີງ ປະທານປະເທດຈີນໄດ້ພົບປະກັບທ່ານເຊີກິໂອ ມະມາເຣລາ, ປະທານາທິບໍດີອີຕາລີ. ປະມຸກລັດສອງປະເທດຕ່າງກໍເຫັນດີເສີມຂະຫຍາຍສາຍພົວພັນລະຫວ່າງສອງປະເທດຈາກລະດັບຍຸດທະສາດແລະສາຍຕາຍາວນານໃຫ້ຂຶ້ນສູ່ລະດັບສູງກວ່າເກົ່າ, ແລະສ້າງຄວາມຜາສຸກໃຫ້ແກ່ປະຊາຊົນສອງປະເທດຫຼາຍກວ່າເກົ່າ.
ທ່ານສີຈິ້ນຜີງກ່າວວ່າ, ຕະຫຼອດໄລຍະ 47 ປີແຫ່ງການສ້າງຕັ້ງການພົວພັນທາງການທູດເປັນຕົ້ນມາ, ສອງຝ່າຍມີຄວາມສະເໝີພາບກັນ, ຮ່ວມມືກັນຕ່າງຝ່າຍຕ່າງມີຜົນປະໂຫຍດແລະກາຍເປັນຄູ່ຮ່ວມມືຍຸດທະສາດຮອບດ້ານ. ຂະນະດຽວກັນຈີນກໍຍິນດີຕ້ອນຮັບອີຕາລີເຂົ້າຮ່ວມ ກໍ່ສ້າງ "ໜຶ່ງແລວທາງໜຶ່ງເສັ້ນທາງ", ສ້າງເວທີການລົງເລິກການຮ່ວມມືລະຫວ່າງສອງປະເທດໃຫ້ກວ້າງກວ່າເກົ່າ. ທັງສະໜັບສະໜູນການເຊື່ອມໂຍງເຂົ້າກັນຂອງເອີລົບ, ແລະຫວັງວ່າສອງຝ່າຍຈະຕັ້ງໜ້າສ້າງສາຍພົວພັນຄູ່ຮ່ວມມືສັນຕິພາບ, ເຕີບໂຕ, ການປະຕິຮູບແລະວັດທະນະທຳ, ຮ່ວມກັນສ້າງໂລກແຫ່ງສັນຕິພາບ, ເປີດປະຕູ, ກວມລວມແລະຈະເລີນຮຸ່ງເຮືອງ.
ທ່ານມະມາເຣລາກ່າວວ່າ, ອີຕາລີຍິນດີເພີ່ມທະວີການໄປມາຫາສູ່ກັນໃນລະດັບສູງກັບຈີນ, ເພີ່ມທະວີການຮ່ວມມືທັງຂົງເຂດເສດຖະກິດການຄ້າ, ວັດທະນະທຳແລະອື່ນໆ, ເສີມຂະຫຍາຍການພົວພັນເສດຖະກິດການຄ້າທີ່ມີປະສິດທິຜົນຫຼາຍກວ່າເກົ່າ, ຊຸກຍູ້ການແລກປ່ຽນວັດທະນະທຳພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ". ຂະນະດຽວກັນກໍສະໜັບສະໜູນການຮັກສາລະບົບການຄ້າຫຼາຍຝ່າຍທີ່ເປີດປະຕູ, ຍິນດີເພີ່ມທະວີການປະສານສົມທົບກັບຈີນໃນວຽກງານພາກພື້ນແລະສາກົນແລະສຸມກຳລັງເພື່ອຊຸກຍູ້ສາຍພົວພັນລະຫວ່າງເອີລົບກັບຈີນໃຫ້ຂະຫຍາຍລົງສູ່ລວງເລິກ.
ຫຼັງເຈລະຈາ, ປະມຸກລັດສອງປະເທດໄດ້ເຂົ້າຮ່ວມເປັນສັກຂີພິຍານຂອງພິທີລົງນາມເອກະສານຮ່ວມມືສອງຝ່າຍໃນຂົງເຂດວັດທະນະທຳ, ເຕັກນິກວິທະຍາສາດ, ການສຶກສາ, ສາທາລະນະສຸກ, ເສດຖະກິດການຄ້າແລະການປະດິດສ້າງໃໝ່ແລະອື່ນໆ.