ເຈົ້າໜ້າທີ່ຊົງວາເຕ ທຳນຽບປະທານາທິບໍດີ ສ.ເກົາຫຼີ ໄດ້ປະຕິເສດໃນວັນທີ 23 ກຸມພານີ້ ໃນກໍລະນີທີ່ທ່ານນາງປັກກຸນເຮສະໝັກໃຈລາອອກຈາກຕຳແໜ່ງປະທານາທິບໍດີ ກ່ອນສານລັດຖະທຳມະນູນຕັດສິນຄະດີຖອດຖອນຕົນ ເພື່ອຫຼີກເວັ້ນການຖືກກ່າວຟ້ອງ.
ເຈົ້າໜ້າທີ່ຜູ້ນີ້ເວົ້າຕໍ່ສື່ມວນຊົນ ສ.ເກົາຫຼີວ່າ: ຊົງວາເຕບໍ່ໄດ້ພິຈາລະນາຄວາມເປັນໄປໄດ້ກ່ຽວກັບທ່ານນາງປັກກຸນເຮສະໝັກໃຈລາອອກຈາກຕຳແໜ່ງ ແລະກໍບໍ່ມີໃຜຫາລືທາງເລືອກນີ້ແຕ່ປະການໃດ ທັງບໍ່ຮູ້ວ່າຄຳຊ່າລືນີ້ເກີດມາຈາກໃສ.
ທັງນີ້, ສື່ມວນຊົນ ສ.ເກົາຫຼີ ໄດ້ລາຍງານຫວ່າງມໍ່ໆນີ້ວ່າ, ທ່ານນາງປັກກຸນເຮອາດຈະສະໝັກໃຈລາອອກຈາກຕຳແໜ່ງ ກ່ອນສານລັດຖະທຳມະນູນຕັດສິນຄະດີຖອດຖອນ ກໍຄື ສະແຫວງຫາການບັນລຸສັນຍາການເມືອງໃດໜຶ່ງກັບຝ່າຍທີ່ກ່ຽວຂ້ອງ ເພື່ອຫຼີກເວັ້ນບໍ່ໃຫ້ຕົນຖືກກ່າວຟ້ອງໃນຂໍ້ຫາ "ຄົນສະໜິດແຊກແຊງວຽກງານບໍລິຫານລັດ".
ບຸກຄົນຈຳນວນໜຶ່ງຂອງ ສ.ເກົາຫຼີ ຊີ້ວ່າ: ຖ້າວ່າທ່ານນາງປັກກຸນເຮສະໝັກໃຈລາອອກຈາກຕຳແໜ່ງ ກໍຈະບໍ່ເຮັດໃຫ້ວຽກງານບໍລິຫານລັດວຸ້ນວາຍຕື່ມອີກຈາກການຕັດສິນຂອງສານລັດຖະທຳມະນູນ. ແຕ່ຂະນະດຽວກັນ ກໍມີບາງຄົນເຫັນວ່າ ທ່ານນາງປັກກຸນເຮ ຫວັງຢາກອອກຈາກຕຳແໜ່ງໂດຍບໍ່ມີມົນທິນ ເພື່ອຫຼີກເວັ້ນການລົງໂທດຕາມກົດໝາຍ.
