ຕາມຂ່າວສານຊິນຮວາ:ທ່ານກາລິດ ອາບູ ບາກາ ຜູ້ບັນຊາການຕຳຫຼວດມາເລເຊຍກ່າວຕໍ່ສື່ມວນຊົນໃນວັນທີ 23 ກຸມພານີ້ວ່າ,ໄດ້ຂໍຄວາມຊ່ວຍເຫຼືອຈາກອົງການຕຳຫຼວດອາຍາສາກົນເພື່ອຊ່ວຍຊອກຈັບຜູ້ຕ້ອງສົງໄສ 4 ຄົນໃນຄະດີຊາຍສປປເກົາຫຼີເສຍຊີວິດຢູ່ປະເທດຕົນໃນວັນທີ 13 ກຸມພານີ້.
ທ່ານຄາລິດກ່າວໃນໂອກາດເຂົ້າຮ່ວມກິດຈະກຳທາງສັງຄົມເທື່ອໜຶ່ງວ່າ,ມາເລເຊຍໄດ້ຮ້ອງຂໍໃຫ້ອົງການຕຳຫຼວດອາຍາສາກົນປະກາດແຈ້ງການເພື່ອຊ່ວຍຊອກຈັບຜູ້ຕ້ອງສົງໄສ 4 ຄົນເນື່ອງຈາກຕຳຫຼວດເຫັນວ່າ,ຜູ້ຕ້ອງສົງໄສຫຼາຍຄົນໄດ້ໜີອອກຈາກມາເລເຊຍແລະກັບຄືນສປປເກົາຫຼີໃນວັນເກີດເຫດ.
ທ່ານກ່າວຕື່ມວ່າ,ສຳລັບເຈົ້າໜ້າທີ່ທີ່ຍັງຢູ່ສະຖານທູດສປປເກົາຫຼີປະຈຳມາເລເຊຍຜູ້ໜຶ່ງທີ່ກ່ຽວຂ້ອງກັບຄະດີຕາມປະກາດແຈ້ງການກ່ອນໜ້ານີ້,ມາເລເຊຍໄດ້ຝາກຈົດໝາຍໃຫ້ສະຖານທູດສປປເກົາຫຼີຜ່ານກະຊວງການຕ່າງປະເທດໂດຍຂໍໃຫ້ເຈົ້າໜ້າທີ່ທີ່ກ່ຽວພັນກັບຄະດີຜູ້ນີ້ສະແດງຕົວອອກມາ.ແນວໃດກໍດີ,ເຖິງວ່າເຈົ້າໜ້າທີ່ທີ່ກ່ຽວພັນກັບຄະດີມີອະພິສິດທາງການທູດກໍຕາມ,ແຕ່ຕຳຫຼວດກໍມີສິດສອບປາກຄຳແລະປະສານກັບການສືບສວນໄດ້.
ຂ່າວລາຍງານອີກວ່າ,ຕອນເຊົ້າວັນທີ 23 ກຸມພານີ້,ເຈົ້າໜ້າທີ່ສະຖານທູດສປປເກົາຫຼີປະຈຳມາເລເຊຍຜູ້ໜຶ່ງໄດ້ກ່າວຕໍ່ສື່ມວນຊົນທີ່ລໍຖ້າຢູ່ນອກສະຖານທູດໂດຍໄດ້ປະຕິເສດຕໍ່ການກ່າວກ່ຽວກັບເຈົ້າໜ້າທີ່ເລຂາຊັ້ນສອງຂອງສະຖານທູດສປປເກົາຫຼີຜູ້ໜຶ່ງກ່ຽວຂ້ອງກັບຄະດີແລະກ່າວວ່ານີ້ເປັນ "ການຢຽບຢ່ຳ"ອະທິປະໄຕຂອງສປປເກົາຫຼີຢ່າງຮ້າຍແຮງທີ່ສຸດ.
 |
