ກອງປະຊຸມລັດຖະບານ ສະໄໝສາມັນປະຈຳເດືອນກຸມພາ 2017 ໄດ້ໄຂຂຶ້ນຢ່າງເປັນທາງການ ໃນວັນທີ 23 ກຸມພາ ຢູ່ທີ່ສຳນັກງານນາຍົກລັດຖະມົນຕີ ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ມີບັນດາທ່ານຮອງນາຍົກລັດຖະມົນຕີ ສະມາຊິກ ລັດຖະບານ ພ້ອມດ້ວຍແຂກຖືກເຊີນ ເຂົ້າຮ່ວມ.
ກອງປະຊຸມຄັ້ງນີ້ ຈະໄດ້ພ້ອມກັນສຸມໃສ່ຄົ້ນຄວ້າ ປຶກສາຫາລື ປະກອບຄວາມເຫັນ ແລະ ຈະໄດ້ພິຈາລະນາເອົາບັນຫາສຳຄັນຮີບດ່ວນຈຳນວນໜຶ່ງ ເປັນຕົ້ນ ຮ່າງກົດໝາຍວ່າດ້ວຍນ້ຳ ແລະ ຊັບພະຍາກອນແຫຼ່ງນ້ຳ ສະບັບປັບປຸງ ຮ່າງກົດໝາຍວ່າດ້ວຍການປົກປ້ອງອຸດສາຫະກຳພາຍໃນ ບົດລາຍງານສະພາບພົ້ນເດັ່ນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 3 ເດືອນຂ້າມຜ່ານປີ 2016 ໝົດປີ 2016 ແລະ ສະຫຼຸບລາຍງານການຈັດຕັ້ງປະຕິບັດແຜນໃນງວດທີ I ປະຈຳປີ 2017 ບົດລາຍງານກ່ຽວກັບແຜນການພັດທະນາວິສາຫະກິດຂະໜາດນ້ອຍ ແລະ ຂະໜາດກາງ ຍຸດທະສາດວຽກງານການຈົດທະບຽນ ແລະ ສະຖິຕິພົນລະເມືອງ 2016-2025 ບົດລາຍງານກ່ຽວກັບໂຄງການກໍ່ສ້າງທາງດ່ວນເສັ້ນຄູ່ຂະໜານຖະໜົນ ໄກສອນ ພົມວິຫານ ຕິດພັນກັບໂຄງການສ້າງເຂດພັດທະນາດອກຈຳປາ ຮ່າງດຳລັດວ່າດ້ວຍຢາປາບສັດຕູພືດ ສະບັບປັບປຸງ ຮ່າງດຳລັດວ່າດ້ວຍກອງທຶນສ້າງ ແລະ ພັດທະນາສີມືແຮງງານ ບົດລາຍງານກ່ຽວກັບບັນຫາຢາເສບຕິດ ບົດລາຍງານກ່ຽວກັບຜົນຂອງກອງປະຊຸມ ຄັ້ງທີ 39 ຂອງຄະນະກຳມະການຮ່ວມມືທະວິພາຄີ ລະຫວ່າງລັດຖະບານລາວ ແລະ ຫວຽດນາມ ປະຈຳປີ 2017.
ໃນໂອກາດກ່າວໄຂກອງປະຊຸມ ທ່ານນາຍົກລັດຖະມົນຕີ ໄດ້ຮຽກຮ້ອງໃຫ້ສະມາຊິກລັດຖະບານ ເອົາໃຈໃສ່ຍົກສູງຄວາມຮັບຜິດຊອບໃນການປະກອບຄຳຄິດຄຳເຫັນ ເພື່ອເຮັດໃຫ້ກອງປະຊຸມຄັ້ງນີ້ບັນລຸຕາມຄາດໝາຍທີ່ວາງໄວ້.
 |
