ໃນວັນທີ 23-24 ກຸມພານີ້, ກອງປະຊຸມຄັ້ງທີໜຶ່ງລະຫວ່າງຜູ້ປະສານງານກຸ່ມປະເທດBRICS 2017ໄດ້ຈັດຂຶ້ນຢູ່ເມືອງໜານຈິ່ງແຂວງຈ່ຽງຊູ່ປະເທດຈີນ. ທ່ານຢາງເຈສື ທີ່ປຶກສາແຫ່ງລັດຈີນໄດ້ເຂົ້າຮ່ວມແລະກ່າວປາໄສໃນພິທີໄຂ. ກອງປະຊຸມໄດ້ລົງເລິກປຶກສາຫາລືກັນກ່ຽວກັບສະຖານະການເສດຖະກິດການເມືອງຂອງໂລກ, ຈຸດໜັກແຫ່ງການຮ່ວມມືລະຫວ່າງປະເທດ BRICS ໃນປີ2017 ພ້ອມກັບການຈັດສັນວຽກງານປີນີ້, ແລະໄດ້ກ້າວເຖີງຂັ້ນມີຄວາມຮັບຮູ້ຄືກັນຢ່າງກວ້າງຂວາງ ໂດຍໝູນອ້ອມຫົວຂໍ້ "ລົງເລິກການພົວພັນຄູ່ຮ່ວມກຸ່ມ BRICS, ບຸກເບີກອະນາຄົດທີ່ສະຫວ່າງສະໄຫວກວ່າເກົ່າ". ທຸກຝ່າຍເຫັນໂດຍທົ່ວໄປວ່າ, ການຮ່ວມມືໃນກຸ່ມ BRICS ໄດ້ຜ່ານຜ່າໄລຍະເວລາ10ກວ່າປີ, ໄດ້ຜະເຊີນໜ້າກັບໂອກາດແລະການທ້າທາຍໃໝ່. ກຸ່ມ BRICS ຄວນນຳໃຊ້ກົນໄກຕ່າງໆຢ່າງເຕັມທີ່ ເຊັ່ນ: ກອງປະຊຸມຜູ້ແທນຊັ້ນສູງດ້ານວຽກງານຄວາມໝັ້ນຄົງ, ການພົບປະລະດັບລັດຖະມົນຕີ ແລະອື່ນໆ, ເພີ່ມທະວີການແລກປ່ຽນແລະປະສານງານໃນບັນຫາສາກົນແລະພາກພື້ນ, ເສີມຂະຫຍາຍບົດບາດທີ່ສ້າງສັນໃນການປ້ອງກັນ ສັນຕິພາບແລະຄວາມໝັ້ນຄົງຂອງໂລກ.
ບັນດາຝ່າຍເປັນເອກະສັນກັນເຫັນວ່າ, ຈະສະໜັບສະໜູນຈີນເປັນເຈົ້າພາບຈັດການພົບປະທີ່ນະຄອນເຊ້ຍເມີນໃຫ້ດີ, ເຊື່ອວ່າ ພາຍໃຕ້ຄວາມພະຍາຍາມຮ່ວມຂອງຈີນແລະບັນດາຝ່າຍ, ການຮ່ວມມືໃນກຸ່ມ BRICS ໃນປີນີ້ຍ່ອມຈະໄດ້ຮັບໝາກຜົນອັນອຸດົມສົມບູນ.
ວັນທີ 1 ມັງກອນປີ 2017ນີ້, ຈີນໄດ້ເປັນປະເທດປະທານກຸ່ມ BRICS ຢ່າງເປັນທາງການ, ແລະຈະຈັດການພົບປະຄັ້ງທີ 9 ລະຫວ່າງຜູ້ນຳປະເທດກຸ່ມ BRICS ຢູ່ເມືອງເຊ້ຍເມີນແຂວງຟູຈ້ຽນຈີນໃນວັນທີ 3-5 ກັນຍາປີນີ້.