ເມືອງອານບັບຢູ່ພາກເໜືອຊີເລຍໄດ້ເກີດເຫດການຫຼອນໂຈມຕີດ້ວຍລະເບີດລົດຍົນໃນວັນທີ 24 ກຸມພານີ້,ສົ່ງຜົນເຮັດໃຫ້ກຸ່ມປະກອບອາວຸດຝ່າຍຄ້ານຊີເລຍແລະສາມັນຊົນ 60 ຄົນເສຍຊີວິດ ເປັນຢ່າງໜ້ອຍແລະ 100 ກວ່າຄົນບາດເຈັບ.
ຂ່າວສານອານາໂດລູປະເທດຕວັກກີລາຍງານວ່າ,ການຫຼອນໂຈມຕີດ້ວຍລະເບີດລົດຍົນເທື່ອນີ້ກໍ່ຂຶ້ນໂດຍກຸ່ມຫົວຮຸນແຮງໄອແອັດສໂດຍມີເປົ້າໝາຍແນໃສ່ກຸ່ມປະກອບອາວຸດຝ່າຍຄ້ານຄື "ກອງ ທະຫານອິດສະຫຼະຊີເລຍ"ຢູ່ບ້ານແຫ່ງໜຶ່ງເຂດອານບັບ.ໃນຈຳນວນຜູ້ເສຍຊີວິດສ່ວນຫຼາຍແມ່ນປະຊາຊົນທ້ອງຖິ່ນ,ຜູ້ບາດເຈັບຈຳນວນໜຶ່ງຖືກນຳສົ່ງໄປປິ່ນປົວຢູ່ໂຮງໝໍທີ່ຕັ້ງຢູ່ເຂດຊາຍແດນ ລະຫວ່າງຕວັກກີແລະຊີເລຍ.
ຂະນະດຽວກັນ,ໜັງສືພິມຮູຣີເຢັບຂອງຕວັກກີລາຍງານວ່າ,ຫຼັງຈາກນັ້ນ,ບ້ານດຽວກັນເຂດອານບັບໄດ້ເກີດການລະເບີດຄັ້ງທີສອງ,ສົ່ງຜົນເຮັດໃຫ້ 8 ຄົນເສຍຊີວິດ.ແນວໃດກໍດີ,ປັດຈຸບັນຍັງບໍ່ມີບຸກຄົນຫຼືອົງການໃດກ່າວອ້າງວ່າໄດ້ກໍ່ເຫດການລະເບີດຄັ້ງນີ້.
ກຳລັງປະກອບອາວຸດຕວັກກີອອກຖະແຫຼງການໃນວັນທີ 24 ກຸມພານີ້ວ່າ, ຝ່າຍຄ້ານຊີເລຍຄື"ກອງທະຫານອິດສະຫຼະຊີເລຍ"ທີ່ຕວັກກີສະໜັບສະໜູນໄດ້ຄວບຄຸມເມືອງອານບັບທີ່ເປັນເມືອງຍຸດທະສາດທັງໝົດແລ້ວ.ຂະນະທີ່ທ່ານຟິກຣີ ໂອເຊັກ ລັດຖະມົນຕີກະຊວງການຕ່າງປະເທດຕວັກກີກໍຢືນຢັນວ່າ,ກອງທະຫານຕັກກີແລະກຸ່ມປະກອບອາວຸດຝ່າຍຄ້ານຊີເລຍທີ່ຕົນສະໜັບສະໜູນໄດ້ຄວບຄຸມເມືອງອານບັບທັງໝົດແລະກຳລັງດຳເນີນການກວາດລ້າງ.