ຫວ່າງກ່ອນນີ້ບໍ່ດົນ,ທ່ານໂດນັນ ທຣໍາ ປະທານາທິບໍດີອາເມລິກາໄດ້ສະແດງຄວາມບໍ່ພໍໃຈຕໍ່ສັນຍາຕັດກຳລັງອາວຸດນິວເຄຼຍອາເມລິກາ-ຣັດເຊຍ, ແລະກ່າວວ່າຈະເພີ່ມກຳລັງອາວຸດນິວເຄຼຍຂອງອາເມລິກາ. ຫຼັງການຂຶ້ນຮັບຕຳແໜ່ງເປັນເວລາ1ເດືອນກວ່າມານີ້,ທ່ານທຣໍາໄດ້ສະແດງທ່າທີນັບມື້ນັບແຂງຂຶ້ນຕໍ່ຣັດເຊຍ, ເຊິ່ງຖ້ອຍຄວາມໃນຄັ້ງນີ້ຍິ່ງເຮັດໃຫ້ຝ່າຍຣັດເຊຍມີສະຕິລະວັງຕົວສູງ. ຊ່ຽວຊານເຫັນວ່າ, ຖ້າລັດຖະບານທຣໍາປະຖິ້ມນະໂຍບາຍຂອງລັດຖະບານອາເມລິກາຫຼາຍຊຸດຜ່ານມາທີ່ຮັກສາຄວາມກໍ້າເກີ່ງກັນກັບຣັດເຊຍໃນດ້ານກຳລັງນິວເຄຼຍ, ຫັນໄປສະແຫວງຫາທ່າແຮງຝ່າຍດຽວ, ກໍອາດຈະພາໄປສູ່ການແຂ່ງຂັນກຳລັງອາວຸດຄືນໃໝ່ລະຫວ່າງອາເມລິກາກັບຣັດເຊຍ. ໂດຍໄດ້ຮັບຜົນກະທົບຈາກເລື່ອງນີ້, ສາຍພົວພັນລະຫວ່າງອາເມລິກາກັບຣັດເຊຍຈະສັບສົນກວ່າເກົ່າ, ແລະຍາກທີ່ຈະປັບປຸງດີຂຶ້ນ.
ຫວ່າງກ່ອນນີ້ບໍ່ດົນ,ໃນເວລາໃຫ້ສຳພາດຕໍ່ຂ່າວສານລອຍເຕີ,ທ່ານທຣໍາກ່າວວ່າ, "ສັນຍາຕັດແລະຈຳກັດອາວຸດຍຸດທະສາດ" ທີ່ອາເມລິກາແລະຣັດເຊຍເຊັນກັນໃນປີ2010ນັ້ນມີລັກສະນະຝ່າຍດ່ຽວ, ມັນຄືກັບສັນຍາກ່ຽວກັບບັນຫານິວເຄຼຍອີຣານ, ເປັນ"ການຄ້າຂາຍໄຮ້ຜົນອີກລາຍໜຶ່ງ"ສຳລັບອາເມລິກາ. ທ່ານທຣໍາຍັງກ່າວວ່າ,ອາເມລິກາຈະຍາດເອົາທ່າແຮງໃນການແຂ່ງຂັນນິວເຄຼຍ, ກໍຕ້ອງເພີ່ມກໍາລັງອາວຸດນິວເຄຼຍ.
ຖ້ອຍຄວາມຂອງທ່ານທຣໍາໄດ້ພາໃຫ້ເກີດສຽງຕອບຢ່າງຮຸນແຮງຢູ່ວົງການການເມືອງແລະການທະຫານຂອງຣັດເຊຍ. ທ່ານລິໂອນິດ ສຼຸດສະກີ, ປະທານ ກຳມາທິການວຽກງານສາກົນສະພາຕ່ຳຣັດເຊຍກ່າວວ່າ, ຖ້າອາເມລິກາສະແຫວງຫາທ່າແຮງໃນຂົງເຂດນິວເຄຼຍ,ມັນຈະຫຼີກລ່ຽງບໍ່ໄດ້ທີ່ຈະເກີດການແຂ່ງຂັນກຳລັງອາວຸດ, ໂລກນີ້ຈະກັບຄືນສູ່ສົງຄາມເຢັນຄັ້ງໃໝ່.
ນັກວິເຄາະຊີ້ອອກວ່າ,ທ່ານທຣໍາກ່າວເຖິງບັນຫາອາວຸດນິວເຄຼຍໃນຄັ້ງນີ້ໂດຍແນໃສ່ຣັດເຊຍ,ອາດຈະຍ້ອນຈຸດປະສົງປັບປຸງພື້ນຖານກຳອຳນາດໃຫ້ໜັກແໜ້ນ.ໂດຍໄດ້ຮັບຜົນກະທົບຈາກເຫດການທີ່ທ່ານມີແຊວ ຟຼິນ,ອະດີດຜູ້ຊ່ວຍວຽກງານຄວາມໝັ້ນຄົງແຫ່ງຊາດຂອງປະທານາທິບໍດີອາເມລິກາ "ສົມຮູ້ຮ່ວມຄິດກັບຣັດເຊຍ", ທ່ານທຣໍາໄດ້ຮັບຮູ້ເຖິງຄວາມກົດດັນອັນແຂງແຮງຈາກກຸ່ມຄົນສຳຄັນທາງການເມືອງຂອງເມລິກາຕໍ່ການປັບປຸງສາຍພົວພັນອາເມລິກາກັບຣັດເຊຍ; ຖ້າບໍ່ປັບປຸງຫຼັກໝັ້ນຕໍ່ຣັດເຊຍ, ຖານະກຳອຳນາດຂອງເຂົາອາດຈະຜະເຊີນກັບສິ່ງທ້າທາຍທີ່ຮ້າຍແຮງຂຶ້ນຕື່ມອີກ.
ສື່ສາກົນຈຳນວນໜຶ່ງເຫັນວ່າ, ທ່ານທຣໍາສົ່ງສັນຍານຫຼ້າສຸດກ່ຽວກັບບັນຫານິວເຄຼຍ,ສະແດງໃຫ້ເຫັນວ່າອາເມລິກາແລະຣັດເຊຍອາດຈະຟື້ນຟູການແຂ່ງຂັນກຳລັງອາວຸດຄືນໃໝ່, ເຊິ່ງຈະເຮັດໃຫ້ສາຍພົວພັນສອງຝ່າຍສັບສົນຂຶ້ນ.