ທ່ານມາຄອນ ເຕີນບູນ ນາຍົກລັດຖະມົນຕີອົສຕຣາລີແລະທ່ານໂຈໂຄ ວິໂດໂດ ປະທານາທິບໍດີອິນໂດເນເຊຍໄດ້ອອກຖະແຫຼງການຮ່ວມຢູ່ເມືອງຊິດນີປະເທດອົສຕຣາລີໃນວັນທີ 26 ກຸມພານີ້ໂດຍຢືນຢັນວ່າ ສອງປະເທດຈະເພີ່ມທະວີການຮ່ວມມືໃນຫຼາຍຂົງເຂດເປັນຕົ້ນການທະຫານ,ເສດຖະກິດການຄ້າ,ການສຶກສາແລະອື່ນໆ.
ສອງຝ່າຍໄດ້ອອກຖະແຫຼງການຮ່ວມຫຼັງພົບປະເຈລະຈາຢູ່ທຳນຽບນາຍົກລັດຖະມົນຕີຂອງທ່ານເຕີນບູນຢູ່ເມືອງຊິດນີວ່າ: ສອງປະເທດຈະດຳເນີນການຮ່ວມມືທາງການທະຫານຄືນໃໝ່ ທັງເພີ່ມທະວີການຮ່ວມມືໃນການຕ້ານລັດທິກໍ່ການຮ້າຍ,ການປາບປາມການຄ້າມະນຸດແລະບັນຫາອື່ນໆ. ໃນດ້ານເສດຖະກິດການຄ້າ, ອິນໂດເນເຊຍເຫັນດີຫຼຸດພາສີສິນຄ້າຈຳນວນໜຶ່ງທີ່ນຳເຂົ້າຈາກອົສຕຣາລີ ຂະນະທີ່ອົສຕຣາລີກໍໄດ້ຫຼຸດພາສີຜະລິດຕະພັນອຸດສາຫະກຳເຄມີທີ່ນຳເຂົ້າຈາກອິນໂດເນເຊຍ.
ການພົວພັນລະຫວ່າງອົສຕຣາລີກັບອິນໂດເນເຊຍພົບຄວາມຫຍຸ້ງຍາກຢ່າງບໍ່ຢຸດຢັ້ງ ເຊັ່ນ ເດືອນພະຈິກປີ 2013, ສື່ມວນຊົນອົສຕຣາລີເປີດເຜີຍວ່າ: ອົງການຂ່າວລັບອົສຕຣາລີເຄີຍລັກຟັງມືຖືຂອງທ່ານຊູຊີໂລ ປະທານາທິບໍດີອິນໂດເນເຊຍໃນເວລານັ້ນພ້ອມດ້ວຍເຈົ້າໜ້າທີ່ອາວຸໂສອິນໂດເນເຊຍຈຳນວນໜຶ່ງ ເຊິ່ງໄດ້ພາໃຫ້ຝ່າຍອິນໂດເນເຊຍຕື່ນຕົກໃຈແລະໂມໂຫທີ່ສຸດ, ຕໍ່ມາ, ອິນໂດເນເຊຍປະກາດໂຈະການຮ່ວມມືກັບອົສຕຣາລີໃນຫຼາຍຂົງເຂດ. ເດືອນມັງກອນປີນີ້, ເຈົ້າໜ້າທີ່ທະຫານອິນໂດເນເຊຍຖະແຫຼງວ່າ: ເນື່ອງຈາກອົສຕຣາລີດູໝິ່ນ 5 ຫຼັກການສະຖາປະນາປະເທດອິນໂດເນເຊຍ, ຈິ່ງໂຈະການຮ່ວມມືກັບອົສຕຣາລີໃນດ້ານການທະຫານທຸກປະການ.
 |
