ທ່ານ ວາລະໄຊ ເລັ່ງສະຫວັດ ຫົວໜ້າພະແນກອຸດສາຫະກຳແລະການຄ້າແຂວງໄຊຍະບູລີ ກ່າວວ່າ, ແຂວງຕົນຈະບຸນລຸມູນຄ່າສົ່ງອອກ 35 ລ້ານໂດລາສະຫະລັດ ແລະນຳເຂົ້າ 18 ລ້ານໂດລາໃນສົກປີນີ້.
ທ່ານເຜີຍໃຫ້ຮູ້ວ່າ, ປີຜ່ານມາ, ແຂວງຕົນບັນລຸມູນຄ່າສົ່ງອອກ 33 ລ້ານໂດລາ ຫຼືບັນລຸ 45,91% ຂອງແຜນການ ເຊິ່ງຫຼຸດລົງ 43% ເມື່ອທຽບໃສ່ໄລຍະດຽວກັນຂອງປີ 2015, ຂະນະທີ່ສິນຄ້າສົ່ງອອກ ຕົ້ນຕໍແມ່ນຜະລິດຕະພັນກະສິກຳ, ສັດລ້ຽງ ແລະເຄື່ອງປ່າຂອງດົງເປັນຕົ້ນ; ສ່ວນການນຳເຂົ້າບັນລຸມູນຄ່າ 17 ລ້ານໂດລາ ຫຼືບັນລຸ 64% ຂອງແຜນການ, ເຊິ່ງຫຼຸດລົງ 14% ເມື່ອທຽບໃສ່ໄລຍະດຽວກັນຂອງປີ 2015. ທັງນີ້ ສິນຄ້ານຳເຂົ້າ ຕົ້ນຕໍແມ່ນວັດຖຸກໍ່ສ້າງ, ອຸປະກອນໄຟຟ້າ, ນ້ຳມັນເຊື້ອໄຟ, ເຄື່ອງອາໄຫຼ່ແລະຊີ້ນສ່ວນລົດຍົນ, ອຸປະກອນການຜະລິດ ແລະອື່ນໆ.