ຂປລ. ໃນປີ 2017 ລັດຖະບານໄດ້ສຸມທຶນຮອນ ເຂົ້າໃສ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຈໍານວນ 1.368,57 ຕື້ກີບ, ໂດຍສຸມໃສ່ 20 ຈຸດສຸມຂອງລັດຖະບານ 28,8 ຕື້ກີບ, 71 ຈຸດສຸມ ຂອງທ້ອງຖິ່ນ 75 ຕື້ກີບ, 145 ຈຸດສຸມ ຈັດສັນພູມລໍາເນົາບ່ອນທໍາມາຫາກິນຂອງປະຊາຊົນ 49,36 ຕື້ກີບ ແລະ ທຶນສົມທົບກອງທຶນ ຫລຸດຜ່ອນຄວາມທຸກຍາກ 11 ຕື້ກີບ.
ທ່ານ ພວງປາຣິສັກ ປະວົງວຽງຄໍາ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ແຈ້ງໃຫ້ຮູ້ເມື່ອບໍ່ດົນມານີ້ວ່າ: ເພື່ອເຮັດວຽກງານການລົງທຶນ ເຂົ້າໃນວຽກງານທີ່ກ່າວມາຂ້າງເທິງນັ້ນ ໃຫ້ມີປະສິດທິພາບ ແລະ ໃຫ້ປະຊາຊົນໄດ້ຮັບຜົນປະໂຫຍດສູງສຸດ ກະຊວງກະສິກໍາ-ປ່າໄມ້ ໄດ້ວາງມາດຕະການຈໍານວນໜຶ່ງ ເປັນຕົ້ນແມ່ນໃຫ້ເອົາໃຈໃສ່ ເປັນເຈົ້າການປະສານງານ ແລະ ຄຸ້ມຄອງການສ້າງແຜນງານ, ແຜນການ ແລະ ໂຄງການລະອຽດ ທີ່ມີຕົວຊີ້ວັດຈະແຈ້ງ ຢູ່ບັນດາຈຸດສຸມ ບູລິມະສິດຮ່ວມກັບບັນດາພາກສ່ວນກ່ຽວຂ້ອງ ຂັ້ນສູນກາງ ແລະ ທ້ອງຖິ່ນ, ປັບປຸງກົງຈັກວຽກງານການ ຈັດຕັ້ງ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກໃຫ້ເຊື່ອມສານ ກັບວຽກງານກະສິກໍາ-ປ່າໄມ້ ທີ່ພວມກໍາລັງປັບປຸງພາລະບົດບາດ ໃນປັດຈຸບັນໃຫ້ມີຄວາມເຂັ້ມແຂງ, ເພີ່ມທະວີຄວາມເຂັ້ມງວດ ໃນການຈັດຕັ້ງປະຕິບັດແຜນການ ແລະ ການເງິນ, ຍົກເວັ້ນການປະຕິບັດໂຄງການນອກແຜນ, ຍົກສູງສະຕິເຄົາລົບ ແລະ ປະຕິບັດລະບຽບກົດໝາຍ ຢ່າງເຂັ້ມງວດ ເພື່ອຫລີກລ້ຽງໜີ້ສິນຄຸມເຄືອ ສໍາລັບປີຕໍ່ໄປ, ປະຕິບັດໂຄງການລົງທຶນຂອງລັດ ເຂົ້າໃນວຽກງານ ພັດທະນາຊົນນະບົດ ແລະ ລືບລ້າງຄວາມທຸກຍາກໄປຕາມຈຸດສຸມ, ເດັດຂາດບໍ່ປະຕິບັດໂຄງການ ນອກແຜນ ຫລື ໂຄງການລົງທຶນກ່ອນ ໂດຍປະຕິບັດຕາມ ຄໍາສັ່ງຂອງນາຍົກລັດຖະມົນຕີຢ່າງເຄັ່ງຄັດ, ຂະແໜງການທີ່ກ່ຽວຂ້ອງ ຂັ້ນແຂວງ, ຂັ້ນເມືອງ, ຕ້ອງກໍານົດຕາມຫົວໜ່ວຍລາຄາ ໃນການກໍ່ສ້າງພື້ນຖານໂຄງລ່າງ ຢູ່ຊົນນະບົດເປັນຕົ້ນ ໂຮງຮຽນ, ໂຮງໝໍ, ນ້ຳລີນ, ຕາຂ່າຍໄຟຟ້າ, ເສັ້ນທາງ ແລະ ອື່ນໆ ໂດຍໃຫ້ມີມາດຕະການຈັດຕັ້ງ ແລະ ຕິດຕາມກວດກາຢ່າງເຂັ້ມງວດ ເພື່ອຫລີກລ້ຽງໂຄງການ ທີ່ມີມູນຄ່າສູງເກີນຄວາມເປັນຈິງ.