ທ່ານ ໂຮເຊັນ ດາເຮີກັນ ລັດຖະມົນຕີກະຊວງປ້ອງກັນປະເທດອີຣານ ກ່າວໃນວັນທີ 27 ກຸມພານີ້ວ່າ, ປະເທດຕົນໄດ້ປະສົບຜົນສຳເລັດໃນການຍິງຂີປະນາວຸດຈາກກຳປັ່ນດຳນ້ຳຄັ້ງໃໝ່ໃນການຊ້ອມຮົບ 'ເວລາຢັດ 95' ກອງທັບເຮືອ, ເຊິ່ງຂີປະນາວຸດດັ່ງກ່າວຊື່ວ່າ 'ນາເຊີ' ມີຄວາມໝາຍວ່າ 'ຜູ້ຊ່ວຍເຫຼືອ' ທີ່ຜະລິດໂດຍກະຊວງປ້ອງກັນປະເທດ,ຫຼັງຍິງໂດຍເຮືອດຳນ້ຳ ແລະຖືກເປົ້າໝາຍ.
ກອງທັບເຮືອອີຣານເລີ່ມດຳເນີນການຊ້ອມຮົບ 'ເວລາຢັດ 95' ຢູ່ອ່າວເປີເຊຍແລະພາກເໜືອມະຫາສະໝຸດອິນເດຍເມື່ອວັນທີ 26 ກຸມພານີ້ ເຊິ່ງເຂດດັ່ງກ່າວຕັ້ງຢູ່ໃກ້ເສັ້ນຂະໜານ 10 ອົງສາເໜືອ ແລະມີເນື້ອທີ່ປະມານ 2 ລ້ານກິໂລຕາແມັດ ແລະ ນີ້ແມ່ນການຊ້ອມຮົບຂະໜາດໃຫຍ່ຄັ້ງທຳອິດຂອງອິຣານນັບແຕ່ທ່ານ ໂດນັນ ທຣຳ ດຳລົງຕຳແໜ່ງປະທານາທິບໍດີອາເມລິກາເປັນຕົ້ນມາ.