ທ່ານລຽວຈົງໄລ ລັດຖະມົນຕີກະຊວງຄົມມະນາຄົມມາເລເຊຍຢືນຢັນຢູ່ນະຄອນຫຼວງກົວລາລຳເປີໃນວັນທີ 28 ກຸມພາຜ່ານມາວ່າໄດ້ພົບຊາກເຮືອບິນໂດຍສານຖ້ຽວບິນ MH370 ອີກສອງຊິ້ນສ່ວນ ແລະຈະຖະແຫຼງລາຍລະອຽດໃນຕໍ່ໜ້າ. ມາຮອດປັດຈຸບັນໄດ້ພົບຊາກເຮືອບິນດັ່ງກ່າວທັງໝົດ 27 ຊິ້ນສ່ວນ.
ທ່ານລຽວຈົງໄລກ່າວວ່າ: ປະເທດຕົນໄດ້ເຊັນບົດບັນທຶກຄວາມເຂົ້າໃຈກັບບັນດາປະເທດອາຟຣິກາຢູ່ລຽບຕາມຝັ່ງມະຫາສະໝຸດອິນເດຍ ເພື່ອໃຫ້ປະເທດຕ່າງໆຊ່ວຍຊອກຫາແລະເກັບໂຮມຊີ້ນສ່ວນຊາກເຮືອບິນທີ່ຖືກຊັກຂຶ້ນຝັ່ງ.
ທ່ານລຽວຈົງໄລຍັງກ່າວຕື່ມວ່າ: ເມື່ອໃດທີ່ປະເທດອາຟຣິກາພົບສິ່ງຂອງທີ່ໜ້າສົງໄສກໍຈະແຈ້ງມາ ທັນທີ ແລະມາເລເຊຍກໍຈະສົ່ງໜ່ວຍຄົ້ນຫາໄປກູ້ເອົາຊາກເຮືອບິນທັນທີ.ທັງນີ້, ກ່ອນທ້າຍປີ 2017, ເຈົ້າໜ້າທີ່ສືບສວນຈະເຮັດບົດລາຍງານສະບັບສຸດທ້າຍກ່ຽວກັບການຫາຍສາບສູນຂອງເຮືອບິນໂດຍສານຖ້ຽວບິນ MH370.