ຕາມຂ່າວCRI: ພິທີຖະແຫຼງຂ່າວການຮ່ວມມືຮູບເງົາແລະໂທລະພາບຈີນ-ໄທ ກໍຄືການສ້າງຕັ້ງບໍລິສັດ CIBN Film ທີ່ນະຄອນຫຼວງບາງກອກ ໄດ້ຈັດຂຶ້ນໃນວັນທີ 28 ກຸມພາຜ່ານມາ ໂດຍທ່ານປະນັດດາ ດິສະກຸນ ຮອງລັດຖະມົນຕີກະຊວງສຶກສາທິການໄທ, ທ່ານເສິນຈ່ຽງ ທີ່ປຶກສາທູດວັດທະນະທຳຈີນປະຈຳໄທ ພ້ອມດ້ວຍແຂກຜູ້ມີກຽດ, ນັກສະແດງຈີນໄທ 50 ກວ່າຄົນ ແລະບຸກຄົນໃນວົງການສື່ມວນຊົນຈີນໄທ 200 ກວ່າຄົນເຂົ້າຮ່ວມ.
ການລົງທຶນສ້າງຕັ້ງບໍລິສັດ CIBN Film ເຊິ່ງແມ່ນ ບໍລິສັດ OCTV ທີ່ຂຶ້ນກັບສຳນັກງານໃຫຍ່ອາຊີຂອງບໍລິສັດ CIBN ກໍເພື່ອສ້າງເປັນເວທີການຮ່ວມມືດ້ານຮູບເງົາແລະໂທລະພາບຈີນ-ໄທ, ປະສານໂຄງການແລະເນື້ອໃນຮູບເງົາແລະໂທລະພາບ, ເຊື່ອມໂຍງຕະຫຼາດສອງປະເທດ ແລະຊຸກຍູ້ການຮ່ວມມືດ້ານຜະລິດ, ໂຄສະນາ ແລະຈຳໜ່າຍຮູບເງົາແລະໂທລະພາບລະຫວ່າງຈີນ-ໄທ. ນີ້ແມ່ນກ້າວທຳອິດທີ່ສື່ໃໝ່ຈີນເຂົ້າສູ່ໄທ ແລະເປັນການທົດລອງທີ່ເດັດດ່ຽວ ເພື່ອຊຸກຍູ້ໃຫ້ຮູບເງົາແລະໂທລະພາບຈີນແລະໄທກ້າວໄປສູ່ໂລກ.