ຕາມຂ່າວສານຊິນຮວາ: ສະພາຄວາມໝັ້ນຄົງອົງການສະຫະປະຊາຊາດໄດ້ລົງຄະແນນສຽງຕໍ່ຮ່າງມະຕິບັນຫາອາວຸດເຄມີຂອງຊີຣີໃນວັນທີ 28 ກຸມພາຜ່ານມາເພື່ອຂວ້ຳບາດບຸກຄົນ ແລະອົງການທີ່ກ່ຽວຂ້ອງຂອງຊີຣີໃນຂໍ້ກ່າວຫາການຫຼອນໂຈມຕີດ້ວຍອາວຸດເຄມີ, ແຕ່ຜົນປະກົດວ່າມີການເຫັນດີ 9 ສຽງ, 3 ສຽງຄັດຄ້ານ ແລະ 3 ບັດງົດອອກສຽງ, ຣັດເຊຍ, ຈີນ ແລະໂບລີເວຍອອກສຽງຄັດຄ້ານ, ກາຊັກສະຖານ, ເອຢິບ ແລະເອເຕໂອປີໄດ້ປ່ອນບັດສະຫຼະສິດ. ຍ້ອນ່າມີປະເທດໃນຄະນະມົນຕີຖາວອນຂອງສະພາຄວາມໝັ້ນຄົງຄັດຄ້ານ, ສະນັ້ນ ສະພາຄວາມໝັ້ນຄົງຈິ່ງບໍ່ໄດ້ຮັບຮອງຮ່າງມະຕິດັ່ງກ່າວ.
ທ່ານຫຼິວເຈຢີ ຜູ້ຕາງໜ້າຖາວອນຈີນປະຈຳອົງການສະຫະປະຊາຊາດກ່າວຫຼັງການລົງຄະແນນສຽງວ່າ, ປັດຈຸບັນ, ຍັງພວມກວດສອບການໃຊ້ວັດຖຸເຄມີຜະລິດເປັນອາວຸດຢູ່ປະເທດຊີຣີ, ແຕ່ກໍມີບາງປະເທດພັດຕັ້ງໃຈຢາກລົງຄະແນນສຽງຕໍ່ຮ່າງມະຕິດັ່ງກ່າວ ທັງໆທີ່ຜົນການກວດສອບຍັງບໍ່ໄດ້ຮັບຄວາມເຫັນດີຈາກຝ່າຍຕ່າງໆ ແລະປະເທດສະມາຊິກສະພາຄວາມໝັ້ນຄົງຍັງມີຄວາມເຫັນຂັດແຍ້ງກັນຫຼາຍຢ່າງ ເຊິ່ງຈະບໍ່ເປັນຜົນດີຕໍ່ການຊຸກຍູ້ການເຈລະຈາສັນຕິພາບເຊີແນວ ແລະຂະບວນການແກ້ໄຂບັນຫາຊີຣີທາງການເມືອງ.