ຕາມຂ່າວສານຊິນຮວາ: ທ່ານເກິງສວງ ໂຄສົກກະຊວງການຕ່າງປະເທດຈີນກ່າວໃນພິທີຖະແຫຼງຂ່າວທີ່ຈັດຂຶ້ນໃນວັນທີ 28 ກຸມພາຜ່ານມານີ້ວ່າ, ໂດຍຕອບສະໜອງຕາມຄຳເຊີນຂອງກະຊວງການຕ່າງປະເທດຈີນ, ທ່ານ ຣີກິວຊົງ ຮອງລັດຖະມົນຕີກະຊວງການຕ່າງປະເທດ ສປປ ເກົາຫຼີໄດ້ເດີນທາງຢ້ຽມຢາມຈີນແຕ່ວັນທີ 28 ກຸມພາ ຫາວັນທີ 4 ມີນາ.
ທ່ານເກິງສວງກ່າວວ່າ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນຈະພົບປະທ່ານຣີກິວຊົງ, ຂະນະທີ່ທ່ານຫຼິວເຈິ້ນໝິນ ຮອງລັດຖະມົນຕີ ແລະທ່ານຂົງສວນຢິ້ວ ຜູ້ຊ່ວຍລັດຖະມົນຕີກະຊວງການຕ່າງປະເທດຈີນຈະເຈລະຈາກັບທ່ານຣີກິວຊົງ ໂດຍສອງຝ່າຍຈະແລກປ່ຽນຄວາມເຫັນກ່ຽວກັບການພົວພັນລະຫວ່າງສອງປະເທດ ພ້ອມດ້ວຍບັນຫາສາກົນ ແລະພາກພື້ນທີ່ສອງຝ່າຍສົນໃຈຮ່ວມກັນ. ທ່ານເກິງສວງກ່າວຕື່ມວ່າ, ທ່ານຣີກິວຊົງເດີນທາງຢ້ຽມຢາມຈີນເທື່ອນີ້ເປັນການພົບປະທາງການທູດທີ່ເປັນປົກກະຕິລະຫວ່າງຈີນກັບ ສປປ ເກົາຫຼີ ແລະກໍແມ່ນເຈົ້າໜ້າທີ່ຂັ້ນສູງ ສປປເກົາຫຼີທີ່ຢ້ຽມຢາມຈີນອີກເທື່ອໜຶ່ງ ພາຍຫຼັງທ່ານຣີຊູຊົງ ຮອງປະທານພັກແຮງງານເກົາຫຼີໄດ້ຢ້ຽມຢາມເມື່ອທ້າຍເດືອນພຶດສະພາປີຜ່ານມາ.
 |
