ສະພາຄວາມໝັ້ນຄົງອົງການສະຫະປະຊາຊາດອອກຖະແຫຼງການໃນວັນທີ 1 ມີນານີ້ໂດຍກ່າວປະນາມຢ່າງຮຸນແຮງຕໍ່ເຫດການຫຼອນໂຈມຕີດ້ວຍລະເບີດຊ້ອນຢູ່ນະຄອນຫຼວງກາບູນປະເທດອັຟການິສະຖານ ທັງຮຽກຮ້ອງໃຫ້ບັນດາປະເທດສຸມທຸກຄວາມພະຍາຍາມຕໍ່ຕ້ານລັດທິກໍ່ການຮ້າຍ.
ຖະແຫຼງການຢ້ຳວ່າ ສະພາຄວາມໝັ້ນຄົງເອົາໃຈໃສ່ຢ່າງຈິງຈັງຕໍ່ກຸ່ມຕາລີບັນ,ກຸ່ມອັນໄກດາ,ກຸ່ມISພ້ອມດ້ວຍກຸ່ມປະກອບອາວຸດຜິດກົດໝາຍຈຳນວນໜຶ່ງທີ່ເປັນໄພຂົ່ມຂູ່ຕໍ່ປະຊາຊົນ,ກອງທັບ,ກອງກຳລັງຮັກສາຄວາມໝັ້ນຄົງຂອງອັຟການິສະຖານ ທັງເນັ້ນວ່າຕ້ອງຈັບຜູ້ປະຕິບັດ,ຜູ້ບົ່ງການ,ຜູ້ໃຫ້ທຶນແລະຜູ້ສະໜັບສະໜູນການກໍ່ການຮ້າຍເຫຼົ່ານີ້ມາລົງໂທດຕາມກົດໝາຍ ທັງຮຽກຮ້ອງໃຫ້ບັນດາປະເທດສຸມທຸກຄວາມພະຍາຍາມຕໍ່ຕ້ານລັດທິກໍ່ການຮ້າຍ.
ຖະແຫຼງການລະບຸວ່າ: ບໍ່ວ່າຄວາມຮຸນແຮງຫຼືການກໍ່ການຮ້າຍໃດໆກໍຕາມລ້ວນແຕ່ບໍ່ສາມາດກີດຂວາງຂະບວນການສັນຕິພາບທີ່ນຳໂດຍຊາວອັຟການິສະຖານແລະສົ່ງເສີມໃຫ້ອັຟການິສະຖານບັນລຸສັນຕິພາບ,ປະຊາທິປະໄຕແລະສະຖຽນລະພາບ.