ຕາມຂ່າວສານຊິນຮວາ: ວັນທີ 1 ມີນານີ້, ທ່ານເອກອັກຄະລັດຖະທູດ ມາຈ່າວຊູ້ ຜູ້ຕາງໜ້າຖາວອນຈີນປະຈຳສຳນັກງານອົງການສະຫະປະຊາຊາດທີ່ເຊີແນວຂອງແລະອົງການຈັດຕັ້ງສາກົນຕ່າງໆຢູ່ສະວິສ ໄດ້ຕາງໜ້າ 140 ປະເທດອອກຖະແຫຼງການຮ່ວມເລື່ອງ 'ຊຸກຍູ້ແລະປົກປັກຮັກສາສິດທິມະນຸດ, ຮ່ວມກັນສ້າງປະຊາຄົມຮ່ວມຊະຕາກຳຂອງມະນຸດ' ໃນກອງປະຊຸມສະພາສິດທະມະນຸດອົງການສະຫະປະຊາຊາດຄັ້ງທີ 34 ແລະໄດ້ຮັບຄວາມເຫັນດີເຫັນພ້ອມຢ່າງກວ້າງຂວາງ.
ທ່ານ ມາຈ່າວຊູ້ ໄດ້ສະເໜີ 5 ຄວາມເຫັນ ຄື: ໜຶ່ງ, ຍຶດໝັ້ນຄວາມສະເໝີພາບດ້ານອະທິປະໄຕ ເຊິ່ງບໍ່ວ່າປະເທດ ນ້ອຍໃຫຍ່, ອ່ອນແອຫຼືເຂັ້ມແຂງ, ທຸກຍາກຫຼືຮັ່ງມີ ລ້ວນແຕ່ແມ່ນສະມາຊິກທີ່ສະເໝີພາບກັນຂອງປະຊາຄົມໂລກ. ອີງຕາມ 'ກົດບັດສະຫະປະຊາຊາດ', ອະທິປະໄຕແລະຜືນແຜ່ນດິນອັນຄົບຖ້ວນຂອງທຸກປະເທດ ຕ້ອງໄດ້ຮັບການເຄົາລົບ. ສອງ, ຍຶດໝັ້ນການສົນທະນາແລະປຶກສາຫາລືກັນ ໂດຍທຸກປະເທດຄວນພະຍາຍາມສ້າງການພົວພັນເພື່ອນມິດທີ່ເຄົາລົບເຊິ່ງກັນແລະກັນ, ຊຸກຍູ້ແລະປົກປັກຮັກສາສິດທິມະນຸດໂດຍຜ່ານຈາກການສົນທະນາແລະການຮ່ວມມືກັນ ແລະປ້ອງກັນການຫັນບັນຫາສິດທິມະນຸດເປັນການເມືອງ. ສາມ, ຍຶດໝັ້ນການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ໃນດ້ານນີ້, ທຸກປະເທດຄວນຮ່ວມແຮງຮ່ວມໃຈ, ເພີ່ມທະວີການສ້າງຂີດຄວາມສາມາດດ້ານສິດທິມະນຸດໂດຍຜ່ານຈາກການຮ່ວມມືທີ່ແທດເໝາະກັບຕົວຈິງແລະເປັນຮູບປະທຳ. ສີ່, ຍຶດໝັ້ນການແລກປ່ຽນແລະຖອດຖອນບົດຮຽນເຊິ່ງກັນແລະກັນ, ເຖິງວ່າອາລະຍະທຳຕ່າງກັນ ແຕ່ກໍຄວນເຄົາລົບກັນ, ຖອດຖອນບົດຮຽນ ແລະກ້າວໜ້າຮ່ວມກັນ ແລະຫ້າ, ຍຶດໝັ້ນການພັດທະນາແບບຍືນຍົງ ໂດຍທຸກປະເທດຄວນຈັດຕັ້ງປະຕິບັດວາລະການພັດທະນາແບບຍືນຍົງ 2030 ໃຫ້ເປັນຮູບປະທຳ ແລະ ສ້າງພື້ນຖານອັນໝັ້ນແກ່ນໃຫ້ແກ່ການຊຸກຍູ້ ແລະ ປົກປັກຮັກສາສິດທິມະນຸດ.
 |
