ຕາມຂ່າວສານຊິນຮວາ: ຜູ້ຕາງໜ້າຖາວອນຂອງສປປເກົາຫຼີໄດ້ກ່າວຕອບໂຕ້ໃນກອງປະຊຸມທີ່ຈັດຂຶ້ນຢູ່ເຊີແນວເມື່ອວັນທີ 28 ກຸມພາຜ່ານມາ ໂດຍປະຕິເສດການກ່າວຫາທີ່ມີສ່ວນກ່ຽວຂ້ອງກັບ 'ເຫດການມາເລເຊຍ'.
ຜູ້ຕາງໜ້າທ່ານນີ້ ໄດ້ຕອບໂຕ້ສ.ເກົາຫຼີໃນກອງປະຊຸມລະດັບສູງຂອງກອງປະຊຸມການເຈລະຈາຫຼຸດກຳລັງຮົບໃນມື້ດັ່ງກ່າວວ່າ, ຄຳກ່າວຫາຂອງລັດຖະມົນຕີການຕ່າງປະເທດສ.ເກົາຫຼີໃນກອງປະຊຸມ ເປັນການດູຖູກທີ່ສຸດ ເຊິ່ງສປປເກົາຫຼີຂໍປະຕິເສດຢ່າງເດັດດ່ຽວຕໍ່ການກ່າວເທັດຂອງສ.ເກົາຫຼີໃນ 'ເຫດການມາເລເຊຍ'.
ທັງນີ້, ທ່ານ ຢຸນບິງເຊ ລັດຖະມົນຕີກະຊວງການຕ່າງປະເທດສ.ເກົາຫຼີໄດ້ປະກອບຄຳເຫັນໃນກອງປະຊຸມວ່າ, ສປປເກົາຫຼີ ໃຊ້ສານພິດເສັ້ນປະສາດ VX ທີ່ຖືກຫ້າມໃນໂລກນັ້ນ ລອບຂ້າອ້າຍຕ່າງແມ່ຂອງທ່ານ ກິມຈົງອຸ່ນ ຜູ້ນຳສປປເກົາຫຼີຄົນປັດຈຸບັນ ແລະການລອບຄາດຕະກຳດັ່ງກ່າວ ສະແດງໃຫ້ເຫັນວ່າ, ທາງການສປປເກົາຫຼີ ກຽມໃຊ້ອາວຸດທຸກຊະນິດຕໍ່ທຸກຄົນຕະຫຼອດເວລາ.
ທ່ານ ຢຸນບິງເຊ ກ່າວຕື່ມວ່າ, ເມື່ອໃດທີ່ລັດຖະບານມາເລເຊຍ ໄດ້ປະກາດຜົນການສືບສວນສຸດທ້າຍແລ້ວ, ອົງການຕ່າງໆ ເຊັ່ນສະພາຄວາມໝັ້ນຄົງສະຫະປະຊາຊາດ ກໍຄວນກຳນົດເອົາການປຶກສາຫາລືເຫດການດັ່ງກ່າວເປັນບູລິມະສິດໃນເມື່ອນັ້ນ.