ກອງທັບລັດຖະບານຊີຣີຍຶດເມືອງປານມີຣາ

ກອງທັບຊີຣີປະກາດໃນວັນທີ 2 ມີນານີ້ວ່າ: ກອງທັບລັດຖະບານສາມາດຍຶດເມືອງປານມີຣາເຊິ່ງເປັນເມືອງເກົ່າແກ່ຢູ່ພາກກາງໄດ້ຄືນຢ່າງສຳເລັດຜົນ.

ກອງທັບຊີຣີໄດ້ອອກຖະແຫຼງການວ່າ: ຈາກການສະໜັບສະໜູນຂອງກອງທັບອາກາດຣັດເຊຍແລະຊີຣີ ໃນການໂຈມຕີກຸ່ມຫົວຮຸນແຮງ IS ຢ່າງຕໍ່ເນື່ອງແລະປະສົບຜົນສຳເລັດໂດຍໃນປັດຈຸບັນສາມາດຄວບຄຸມເມືອງປານມີຣາແລະເຂດອ້ອມຂ້າງໄດ້ແລ້ວ, ຂະນະທີ່ໜ່ວຍທຳລາຍລະເບີດກໍ່ພວມມ້າງອຸປະກອນປະກອບລະເບີດຂອງກຸ່ມ IS.

ຖະແຫຼງການລະບຸອີກວ່າ: ກອງທັບລັດຖະບານຊີຣີມີຄວາມຄືບໜ້າໃນການໂຈມຕີກຸ່ມ IS ຢູ່ແຂວງອາເລັບໂປທາງພາກເໜືອແລະ ຫວ່າງມໍ່ໆມານີ້, ກໍໄດ້ຮັບໄຊຊະນະຫຼັງໂຈມຕີກຸ່ມ IS ຢ່າງໜັກ.

ຖະແຫຼງການເນັ້ນວ່າ:ກອງທັບລັດຖະບານຊີຣີກໍຄືພັນທະມິດແມ່ນກຳລັງໜຶ່ງດຽວທີ່ມີຄວາມສາມາດໂຈມຕີແລະກຳຈັດລັດທິກໍ່ການຮ້າຍ ແລະຈະສືບຕໍ່ໂຈມຕີກຸ່ມ IS ແລະກຸ່ມຫົວຮຸນແຮງກຸ່ມຕ່າງໆຢ່າງເດັດດ່ຽວໜຽວແໜ້ນກວ່າເກົ່າ.