ເວັບໄຊໜັງສືພິມ "ແອເພສ" ຂອງແອສປາຍລາຍງານຫວ່າງບໍ່ດົນມານີ້ວ່າ, ປີຜ່ານມາ, ຈີນໄດ້ສະໜອງເງິນກູ້ໃຫ້ແກ່ເຂດອາເມລິກາລາຕິນເປັນຈຳນວນຫຼາຍ, ຂະນະທີ່ເບຣຊິນ ກໍເປັນປະເທດທີ່ໄດ້ຮັບຜົນປະໂຫຍດຫຼາຍກວ່າໝູ່ຈາກການລົງທຶນຂອງຈີນ.
ລາຍງານຂ່າວໄດ້ອ້າງຕາມບົດລາຍງານປະຈຳປີຂອງສູນການສຶກສາການສົນທະນາທະວີບອາເມລິກາ ແຈ້ງວ່າ: ປີ 2016, ຈີນໄດ້ປ່ອຍເງິນກູ້ໃຫ້ອາເມລິກາລາຕິນເຖິງ 21 ຕື້ 200 ລ້ານໂດລາສະຫະລັດ ເຊິ່ງລື່ນຜົນລວມເງິນກູ້ປະເພດດຽວກັນຂອງທະນາຄານໂລກ ແລະ ທະນາຄານພັດທະນາທະວີບອາເມລິກາ ໃນນີ້ໄດ້ປ່ອຍເງິນກູ້ໃຫ້ລັດຖະບານແລະລັດວິສາຫະກິດເບຣຊິນເຖິງ 15 ຕື້ 200 ລ້ານໂດລາສະຫະລັດ ໂດຍສ່ວນຫຼາຍໄດ້ລົງທຶນເຂົ້າໃນໂຄງການກໍ່ສ້າງພະລັງງານແລະພື້ນຖານໂຄງລ່າງ.
ປັດຈຸບັນ, ເບຣຊິນແມ່ນຄູ່ຄ້າໃຫຍ່ອັນດັບໜຶ່ງ ທັງເປັນປະເທດເປົ້າໝາຍການລົງທຶນຫຼາຍອັນດັບໜຶ່ງ ແລະ ຕະຫຼາດຮັບເໝົາໂຄງການໃຫຍ່ອັນດັບສອງຂອງຈີນຢູ່ເຂດອາເມລິກາລາຕິນ.
