ຕາມຂ່າວສານຊິນຮວາ: ທຳນຽບຂາວອາເມລິກາໄດ້ອອກຖະແຫຼງການໃນວັນທີ 5 ມີນານີ້ວ່າ, ທ່ານປະທານາທິບໍດີ ໂດນັນ ທຣຳ ພວມຮຽກຮ້ອງໃຫ້ລັດຖະສະພາພິຈາລະນາວ່າ ລັດຖະບານອາເມລິກາໄດ້ໃຊ້ສິດສືບສວນຊະຊາຍໃນໄລຍະການເລືອກຕັ້ງເມື່ອປີຜ່ານມາຫຼືບໍ່.
ຖະແຫຼງການລະບຸວ່າ ພາຍຫຼັງໄດ້ຮັບການລາຍງານວ່າ ກ່ອນຈັດການເລືອກຕັ້ງທົ່ວໄປປີຜ່ານມາ ອາດເກີດມີການສືບສວນດ້ວຍຈຸດປະສົງທາງການເມືອງ ເຊິ່ງເຮັດໃຫ້ຄົນເປັນຫ່ວງ ເຊິ່ງທ່ານ ໂດນັນ ທຣຳ ໄດ້ຮຽກຮ້ອງໃຫ້ຖືການພິຈາລະນາດັ່ງກ່າວ ເປັນສ່ວນໜຶ່ງຂອງການຫາຂໍ້ເທັດຈັງຂອງກຳມາທິການຂ່າວສານສະພາຕ່ຳແລະສະພາສູງກ່ຽວກັບການເຄື່ອນໄຫວຂອງຣັດເຊຍໃນການເລືອກຕັ້ງທົ່ວໄປຂອງອາເມລິກາ.
ວັນທີ 4 ມີນານີ້, ທ່ານ ທຣຳ ໄດ້ໂພສລົງສື່ສັງຄົມອອນໄລຢ່າງຕໍ່ເນື່ອງ ໂດຍຕຳໜິລັດຖະບານໂອບາມາທີ່ລັກຟັງການລົງໂທລະສັບກ່ອນວັນເລືອກຕັ້ງທົ່ວໄປຄື ວັນທີ 8 ພະຈິກປີຜ່ານມາ. ແນວໃດກໍດີ ແຕ່ທ່ານ ເຄວິນ ລິວອິສ ໂຄສົກຂອງທ່ານໂອບາມາ ໄດ້ອອກມາປະຕິເສດເລື່ອງດັ່ງກ່າວແລ້ວ.