ທ່ານໂດນັນ ທຣຳ ປະທານາທິບໍດີອາເມລິກາ ໄດ້ອອກດຳລັດສະບັບໃໝ່ໃນວັນທີ 6 ມີນານີ້ ໂດຍໄດ້ປ່ຽນແປງດຳລັດຈຳກັດຄົນຕ່າງປະເທດເຂົ້າເມືອງທີ່ປະກາດໃຊ້ໃນເດືອນທຳອິດຫຼັງຂຶ້ນດຳລົງຕຳແໜ່ງ ແຕ່ກໍເກີດການວິພາກວິຈານຢ່າງໜາຫູ ທັງຖືກສານສະຫະລັດງົດໄວ້ນັ້ນ ໄດ້ປະກາດໃຊ້ອີກຄັ້ງໃໝ່, ຂະນະທີ່ດຳລັດເກົ່າຖືກຍົກເລີກໃນມື້ດຽວກັນ.
ດຳລັດໃໝ່ຈະມີຜົນບັງຄັບໃຊ້ແຕ່ວັນທີ 16 ມີນານີ້ເປັນຕົ້ນໄປ ໂດຍໄດ້ກຳນົດໃຫ້ຢຸດປະຕິບັດໂຄງການຊາວອົບພະຍົບທົ່ວໂລກເຂົ້າອາເມລິກາພາຍໃນ 120 ວັນ ແລະ ຫ້າມບໍ່ໃຫ້ພົນລະເມືອງຊູດັງ, ຊີຣີ, ອີຣານ, ລີບີ, ໂຊມາລີ ແລະ ເຢເມນເຂົ້າອາເມລິກາພາຍໃນ 90 ວັນ. ນອກນີ້, ທ່ານທຣຳ ຍັງໄດ້ລົງນາມໃນບົດບັນທຶກຄວາມເຂົ້າໃຈຕ່າງໆຂອງປະທານາທິບໍດີນຳອີກ.
ດຳລັດໃໝ່ໄດ້ຍົກເລີກຂໍ້ກຳນົດທີ່ຫ້າມບໍ່ໃຫ້ພົນລະເມືອງອີຣັກເຂົ້າເມືອງ ທັງໄດ້ກຳນົດຢ່າງຈະແຈ້ງວ່າຜູ້ຖືບັດຂຽວອາເມລິກາ ແລະ ມີວີຊາທີ່ໃຊ້ໄດ້ ເຊິ່ງເປັນພົນລະເມືອງຂອງປະເທດທີ່ຖືກຫ້າມເຂົ້າຊົ່ວຄາວນັ້ນຈະເຂົ້າອາເມລິກາໄດ້ ທັງບໍ່ໄດ້ຫ້າມຊາວອົບພະຍົບສັນຊາດຊີຣີເຂົ້າອາເມລິກາແບບບໍ່ມີຈຳກັດອີກ.
