ກະຊວງການຕ່າງປະເທດ ສປປ ເກົາຫຼີ ເນລະເທດເອກອັກຄະລັດຖະທູດມາເລເຊຍ

ວັນທີ 6 ມີນານີ້, ກະຊວງການຕ່າງປະເທດ ສປປ ເກົາຫຼີ ໄດ້ປະກາດເນລະເທດເອກອັກຄະລັດຖະທູດມາເລເຊຍປະຈຳປະເທດຕົນແລ້ວ. ສຳນັກຂ່າວສານສູນກາງຂອງ ສປປ ເກົາຫຼີ ລາຍງານວ່າ: ກະຊວງການຕ່າງປະເທດໄດ້ປະກາດໃຫ້ເອກອັກຄະລັດຖະທູດມາເລເຊຍປະຈຳປະເທດຕົນເປັນ "ຜູ້ທີ່ບໍ່ໄດ້ຮັບຄວາມເຊື່ອຖື", ພ້ອມທັງໃຫ້ອອກຈາກປະເທດພາຍໃນ 48 ຊົ່ວໂມງເລີ່ມແຕ່ເວລາ 10 ໂມງຂອງວັນທີ 5 ມີນານີ້ເປັນຕົ້ນໄປ.

ການເນລະເທດດັ່ງກ່າວເປັນຜົນມາຈາກໃນວັນທີ 4 ມີນານີ້,ກະຊວງການຕ່າງປະເທດມາເລເຊຍໄດ້ປະກາດໃຫ້ທ່ານກາງໂຊ ເອກອັກຄະລັດຖະທູດ ສປປ ເກົາຫຼີ ປະຈຳມາເລເຊຍເປັນ "ຜູ້ທີ່ບໍ່ໄດ້ຮັບຄວາມເຊື່ອຖື" ໂດຍຮຽກຮ້ອງໃຫ້ອອກຈາກປະເທດຕົນພາຍໃນເວລາ 48 ຊົ່ວໂມງແລະຈາກນັ້ນ, ທ່ານ ກາງໂຊ ກໍໄດ້ເດີນທາງອອກຈາກມາເລເຊຍໃນຕອນຄ່ຳວັນທີ 6 ມີນານີ້. ຂະນະທີ່ໂຄສົກກະຊວງການຕ່າງປະເທດມາເລເຊຍໄດ້ຢືນຢັນຕໍ່ສື່ມວນຊົນໃນວັນທີ 6 ມີນານີ້ວ່າ: ປັດຈຸບັນ, ເອກອັກຄະລັດຖະທູດມາເລເຊຍປະຈຳ ສປປ ເກົາຫຼີ ທີ່ກະຊວງການຕ່າງປະເທດຕົນຮຽກຄືນປະເທດໃນເມື່ອກ່ອນນັ້ນຍັງຢູ່ມາເລເຊຍ.