ຕາມຂ່າວສານຊິນຮວາ: ກອງບັນຊາການກອງທະຫານອາເມລິກາປະຈຳສ.ເກົາຫຼີ ໄດ້ອອກຖະແຫຼງການໂດຍຢືນຢັນວ່າ, ອຸປະກອນສ່ວນໜຶ່ງຂອງລະບົບ 'ທັດ' ໄດ້ຂົນສົ່ງເຖິງສ.ເກົາຫຼີແລ້ວ.
ຖະແຫຼງການລະບຸວ່າ, ກອງທະຫານອາເມລິກາປະຈຳສ.ເກົາຫຼີ ຈະສືບຕໍ່ຈັດຕັ້ງປະຕິບັດຂໍ້ຕົກລົງລະຫວ່າງສອງປະເທດກ່ຽວກັບການຕິດຕັ້ງລະບົບດັ່ງກ່າວ ແລະຈະເລີ່ມປະຕິບັດໂດຍໄວ.
ນອກນີ້, ກະຊວງປ້ອງກັນປະເທດສ.ເກົາຫຼີ ກໍຢືນຢັນໃນມື້ດັ່ງກ່າວວ່າ, ອຸປະກອນສ່ວນໜຶ່ງຂອງລະບົບ 'ທັດ' ໄດ້ຂົນສົ່ງເຖິງຖານທັບອາກາດອາເມລິກາປະຈຳໂອຊັນ ຫ່າງຈາກນະຄອນຫຼວງເຊອຸນໄປທາງທິດໃຕ້ປະມານ 70 ກິໂລແມັດແລ້ວ. ຂະນະທີ່ສື່ມວນຊົນສ.ເກົາຫຼີກໍລາຍງານວ່າ, ອຸປະກອນທີ່ສົ່ງມາຊຸດນີ້ ມີຖານສົ່ງສອງເຄື່ອງຢູ່ນຳດ້ວຍ.
ສື່ມວນຊົນສ.ເກົາຫຼີລາຍງານຕື່ມວ່າ, ກອງທັບສ.ເກົາຫຼີມີແຜນຈະຕິດຕັ້ງລະບົບ 'ທັດ' ໃຫ້ສຳເລັດໃນລະຫວ່າງເດືອນພຶດສະພາຫາກໍລະກົດປີນີ້.