ທ່ານຫງວຽນຊວນຟຸກ ນາຍົກລັດຖະມົນຕີຫວຽດນາມ ກ່າວໃນໂອກາດຕ້ອນຮັບການເຂົ້າຢ້ຽມຄຳນັບຂອງທ່ານຈິ່ນລີ້ສິນ ຜູ້ອຳນວຍການໃຫຍ່ທະນາຄານລົງທຶນພື້ນຖານໂຄງລ່າງອາຊີ ຫຼື AIIB ຢູ່ນະຄອນຫຼວງຮ່າໂນຍໃນວັນທີ 7 ມີນານີ້ ວ່າ: ທະນາຄານກາງຫວຽດນາມຈະເປັນຜູ້ຮັບຜິດຊອບປະສານງານໃນກິດຈະກຳທີ່ກ່ຽວຂ້ອງຂອງ AIIB ຢູ່ປະເທດຕົນ. ຂະນະທີ່ພື້ນຖານໂຄງລ່າງຫວຽດນາມຕ້ອງການລົງທຶນຢ່າງມະຫາສານ ແລະ ເງິນກູ້ບຸລິມະສິດຂອງ AIIB ທີ່ຕົ້ນທຶນຕ່ຳທັງບໍ່ຕ້ອງການຮັບປະກັນຈາກລັດຖະບານນັ້ນຖືວ່າມີຄວາມໝາຍສຳຄັນຫຼາຍ.
ທ່ານຫງວຽນຊວນຟຸກ ກ່າວຕື່ມວ່າ: ຫວຽດນາມຈະສືບຕໍ່ເປັນຄູ່ຮ່ວມທີ່ເຊື່ອຖືໄດ້ແລະມີຄວາມຮັບຜິດຊອບຂອງ AIIB ທັງຈະປະຕິບັດພັນທະໃນຖານະເປັນສະມາຊິກຂອງ AIIB.
ທ່ານຈິ່ນລີ້ສິນ ໄດ້ກ່າວສະແດງຄວາມຂອບໃຈຫວຽດນາມທີ່ໄດ້ປະກອບສ່ວນຢ່າງຕັ້ງໜ້າໃນການລິເລີ່ມສ້າງຕັ້ງ AIIB ພ້ອມດ້ວຍກິດຈະກຳຕ່າງໆຫຼັງສ້າງຕັ້ງຂຶ້ນ ແລະໃນຖານະເປັນປະເທດທີ່ມີຄວາມສາມາດບົ່ມຊ້ອນອັນມະຫາສານແລະພັດທະນາຢ່າງວ່ອງໄວນັ້ນ ກໍຕ້ອງການລົງທຶນກໍ່ສ້າງພື້ນຖານໂຄງລ່າງ, ຂະນະທີ່ທະນາຄານຕົນກໍຈະຊ່ວຍຫວຽດນາມຕາມຄວາມຕ້ອງການ.