ກອງປະຊຸມຄະນະກຳມະການປະສົມເສດຖະກິດການຄ້າຈີນ-ຟີລິບປິນບັນລຸຄວາມເປັນເອກະພາບກັນຫຼາຍຂໍ້

ຕາມຂ່າວສານຊິນຮວາ: ເຈົ້າໜ້າທີ່ຂັ້ນສູງຂອງກະຊວງການຄ້າຈີນແລະກະຊວງການຄ້າແລະອຸດສາຫະກຳຟີລິບປິນໄດ້ເຂົ້າຮ່ວມກອງປະຊຸມຄະນະກຳມະການປະສົມເສດຖະກິດການຄ້າຈີນ-ຟີລິບປິນຄັ້ງທີ 28 ຢູ່ນະຄອນຫຼວງມະນີລາປະເທດຟີລິບປິນໃນວັນທີ 7 ມີນານີ້ ໂດຍໄດ້ບັນລຸຄວາມເປັນເອກະພາບກັນຫຼາຍຂໍ້ເພື່ອເພີ່ມທະວີການຮ່ວມມືທາງເສດຖະກິດການຄ້າລະຫວ່າງ
ສອງປະເທດ ພາຍຫຼັງຄະນະກຳມະການດັ່ງກ່າວໄດ້ຈັດກອງປະຊຸມມາແລ້ວເມື່ອເດືອນສິງຫາປີ 2011.
ທ່ານຈົ່ງຊ່ານ ລັດຖະມົນຕີກະຊວງການຄ້າຈີນ ທີ່ພວມຢ້ຽມຢາມຟີລິບປິນ ແລະທ່ານຣາມອນ ເອັມ ໂລເປສ໌ ລັດຖະມົນຕີກະຊວງການຄ້າແລະອຸດສາຫະກຳຟີລິບປິນໄດ້ເປັນປະທານກອງປະຊຸມຮ່ວມ ແລະໃນໂອກາດນີ້ ທ່ານຈົ່ງຊ່ານກ່າວວ່າ, ຈີນແລະຟີລິບປິນເອົາໃຈໃສ່ສູງຕໍ່ກອງປະຊຸມຄັ້ງນີ້ ແລະຫວັງໃຫ້ການພົວພັນທາງເສດຖະກິດການຄ້າລະຫວ່າງສອງປະເທດຂະຫຍາຍຕົວໃໝ່ ແລະນຳເອົາຄວາມຜາສຸກມາໃຫ້ປະຊາຊົນສອງຊາດ.

ທ່ານໂລເປສ໌ເປີດເຜີຍວ່າ, ກອງປະຊຸມໄດ້ກຳນົດ 3 ໂຄງການບຸລິມະສິດທີ່ໄດ້ຮັບເງິນກູ້ດອກເບ້ຍຕ່ຳຂອງຈີນ ແລະໄດ້ປຶກສາຫາລືສະຖານທີ່ກໍ່ສ້າງເຂດນິຄົມອຸດສາຫະກຳຈີນຢູ່ຟີລິບປິນ.