ຕາມຂ່າວສານຈີນ: ທ່ານ ຈົ່ງຊ່ານ ລັດຖະມົນຕີກະຊວງການຄ້າຈີນ ໄດ້ເຂົ້າຢ້ຽມຄຳນັບທ່ານ ໂຣດຣີໂກ ດູເຕີເຕ ປະທານາທິບໍດີຟິລິບປິນຢູ່ນະຄອນຫຼວງມະນີລາໃນວັນທີ 7 ມີນານີ້.
ໂອກາດດັ່ງກ່າວ, ທ່ານ ຈົ່ງຊ່ານ ໄດ້ກ່າວວ່າ, ກອງປະຊຸມຄັ້ງທີ 28 ຂອງຄະນະກຳມະການປະສົມເສດຖະກິດການຄ້າສອງປະເທດ ໄດ້ສຳເລັດຜົນຢ່າງຈົບງາມ, ຂະນະທີ່ຈີນຈະເພີ່ມທະວີການຮ່ວມມືກັບຟິລິບປິນພາຍໃຕ້ຂອບຫຼາຍຝ່າຍ, ສະໜັບສະໜູນການເປັນປະທານໝູນວຽນອາຊຽນ, ລົງເລິກການສ້າງເຂດການຄ້າເສລີຈີນ-ອາຊຽນ ແລະຮ່ວມກັນເສີມຂະຫຍາຍບົດບາດທີ່ສ້າງສັນເພື່ອຊຸກຍູ້ການເຈລະຈາ RCEP ໃຫ້ສຳເລັດໂດຍໄວ.
ທ່ານ ຈົ່ງຊ່ານ ຍັງໄດ້ຂອບໃຈທ່ານປະທານາທິບໍດີດູເຕີເຕ ທີ່ຕອບຮັບຄຳເຊີນຂອງທ່ານປະທານ ສີຈິ້ນຜິງ ແລະຈະເດີນທາງເຂົ້າຮ່ວມເວທີປຶກສາຫາລືສຸດຍອດການຮ່ວມມືສາກົນ 'ໜຶ່ງແລວທາງໜຶ່ງເສັ້ນທາງ' ຢູ່ນະຄອນຫຼວງປັກກິ່ງໃນເດືອນພຶດສະພາປີນີ້.
ທ່ານ ດູເຕີເຕ ກ່າວວ່າ, ຈີນແມ່ນເພື່ອນມິດແລະອ້າຍນ້ອງຂອງຟິລິບປິນ, ການຢ້ຽມຢາມຂອງທ່ານ ຈົ່ງຊ່ານ ໃນຄັ້ງນີ້ ໄດ້ສະແດງໃຫ້ເຫັນເຖິງຢ່າງຈະແຈ້ງວ່າ: ຈີນໄດ້ຈັດຕັ້ງປະຕິບັດຄວາມເປັນເອກະພາບກັນຂອງປະມຸກລັດສອງປະເທດຢ່າງເຕັມທີ່ ແລະເອົາໃຈໃສ່ສູງຕໍ່ການເສີມຂະຫຍາຍການຮ່ວມມືທາງເສດຖະກິດການຄ້າລະຫວ່າງສອງປະເທດ ແລະໃນໂອກາດນີ້ ຂໍສະແດງຄວາມຂອບໃຈຈີນທີ່ໃຫ້ຄວາມຊ່ວຍເຫຼືອແລະສະໜັບສະໜູນປະເທດຕົນ.