ວັນທີ 8 ມີນານີ້, ຄະນະກຳມະການແຕ່ງຕັ້ງຂອງລັດຖະສະພາຟີລິບປິນໄດ້ລະງັບການແຕ່ງຕັ້ງທ່ານເປີເປັກໂຕ ຢາໄຊ ເປັນລັດຖະມົນຕີການຕ່າງປະເທດແລະມີຜົນນັບແຕ່ວັນທີ 8 ມີນານີ້ເປັນຕົ້ນໄປເນື່ອງຈາກທ່ານໄດ້ປິດບັງຄວາມຈິງທີ່ຕົນເຄີຍເປັນພົນລະເມືອງອາເມລິກາ.
ໃນການຟັງຄຳໃຫ້ການທີ່ຈັດຂຶ້ນໃນວັນດັ່ງກ່າວ, ທ່ານຢາໄຊກ່າວຮັບວ່າຕົນເຄີຍຖືໜັງສືຜ່ານແດນອາເມລິກາ ທັງສະແດງຄວາມຂໍໂທດທີ່ ເຮັດໃຫ້ຄະນະກຳມະການແຕ່ງຕັ້ງເຂົ້າໃຈຜິດ. ຂະນະທີ່ໃນເດືອນກຸມພາປີນີ້, ທ່ານຢາໄຊກໍໄດ້ຢືນຢັນໃນໂອກາດເຂົ້າຮ່ວມຟັງຄຳໃຫ້ການເທື່ອທຳອິດຂອງຄະນະກຳມະການແຕ່ງຕັ້ງລັດຖະສະພາວ່າ, ຕົນບໍ່ເຄີຍມີໜັງສືຜ່ານແດນອາເມລິກາ.
ຕາມລັດຖະທຳມະນູນຟີລິບປິນ, ຫຼັງໄດ້ຮັບການແຕ່ງຕັ້ງຈາກປະທານາທິບໍດີແລ້ວ, ບັນດາລັດຖະມົນຕີຍັງຕ້ອງຜ່ານການກວດຄຸນວຸດທິແລະໄດ້ຮັບການອະນຸມັດຈາກຄະນະກຳມະການແຕ່ງຕັ້ງຂອງລັດຖະສະພາກ່ອນຈິ່ງຈະສາມາດດຳລົງຕຳແໜ່ງຢ່າງເປັນທາງການໄດ້.