ທ່ານໂຈເຊັຟ ໂວເທວ ຜູ້ບັນຊາການກອງບັນຊາການສູນກາງກອງທັບອາເມລິກາກ່າວໃນວັນທີ 9 ມີນານີ້ວ່າ: ໃນຕໍ່ໜ້າອາດຈະຕ້ອງເພີ່ມກອງກຳລັງອາເມລິກາໄປຊີຣີເພື່ອຮັກສາສະຖຽນລະພາບຂອງປະເທດດັ່ງກ່າວ.
ທ່ານໂວເທວກ່າວໃນໂອກາດເຂົ້າຮ່ວມການຟັງຄຳໃຫ້ການຂອງຄະນະກຳມະການການທະຫານສະພາສູງອາເມລິກາທີ່ຈັດຂຶ້ນໃນວັນທີ 9ມີນານີ້ວ່າ ຂະນະທີ່ການປະຕິບັດການທາງການທະຫານໂຈມຕີກຸ່ມຫົວຮຸນແຮງISຢູ່ຊີຣີໄດ້ເຂົ້າສູ່ໄລຍະທ້າຍ, ການປະຕິບັດການທາງການທະຫານຂອງອາເມລິກາຈະເນັ້ນເປົ້າໝາຍໃນການຮັກສາສະຖຽນລະພາບແລະດ້ານອື່ນໆຫຼາຍກວ່າ, ໃນຕໍ່ໜ້າອາດຈະຕ້ອງໄດ້ສົ່ງກອງກຳລັງໄປຊີຣີຫຼາຍກວ່າເກົ່າ.
ຂະນະດຽວກັນ,ທ່ານໂວເທວກໍ່ປະຕິເສດເປີດເຜີຍຍອດຈຳນວນທະຫານອາເມລິກາທີ່ຈະສົ່ງໄປຊີຣີເພີ່ມຕາມແຜນການ. ແຕ່ສື່ມວນຊົນຫຼາຍສຳນັກຂອງອາເມລິກາເຊິ່ງລວມທັງບໍລິສັດ ABC ລາຍງານວ່າ: ກ່ອນໜ້ານີ້ບໍ່ດົນ, ອາເມລິກາໄດ້ສົ່ງກອງທັບເຮືອສູ້ຮົບເທິງບົກແລະກອງ ຕີພິເສດທະຫານບົກ 400 ຄົນໄປຊີຣີ ເຮັດໃຫ້ທະຫານອາເມລິກາທີ່ປະຈຳຢູ່ຊີຣີເພີ່ມຂຶ້ນເປັນ 900 ຄົນ.